மாணவர்களுக்கு ஆபாச படம் சப்ளை செய்தவர் கைது

நெல்லை: செல்போனில் மாணவர்களுக்கு ஆபாச படங்களை பதிவு செய்து கொடுத்த கடை உரிமையாளர் கைது செய்யப்பட்டார்.

அம்பாசமுத்திரம் அருகேயுள்ள சோலைபுரத்தைச் சேர்ந்தவர் கண்ணன். இவரது மகன் கதிரேசன் என்ற கணேசன். இவர் அம்பை பேருந்து நிலையம் அருகே செல்போன் ரீசார்ஜ் கடை நடத்தி வருகிறார். இவர் அப்பகுதியைச் சேர்ந்த இளைஞர்கள் மற்றும் மாணவர்களுக்கு ஆபாச படங்களை செல்போனில் ப்ளூடூத் மூலம் பதிவு செய்து கொடுத்து வந்தார். இது தொடர்பாக வந்த புகாரின் பேரில் அம்பை இன்ஸ்பெக்டர் ராபின்சன் தலைமையில் போலீசார் அவரது கடையில் அதிரடி சோதனை நடத்தினர்.

அப்போது ஆபாச படங்கள் அடங்கிய ஏராளமான மெமரி கார்டுகள் சிக்கின. இதையடுத்து அங்கிருந்த கம்யூட்டர், மானிட்டர் உள்ளிட்ட பொருட்களை பறிமுதல் செய்த போலீசார் கணேசனை கைது செய்தனர்.