காங். விசிட்டிங் கார்டுகளில் சோனியா, ராகுல் படங்களுக்கு மட்டுமே அனுமதி

சென்னை: தமிழக இளைஞர் காங்கிரஸ் நிர்வாகிகள் தங்களது விசிட்டிங் கார்டுகளில் சோனியா காந்தி, ராகுல் காந்தி ஆகியோரது படங்களைத் தவிர வேறு யாருடைய படங்களையும் போடக் கூடாது என கட்டுப்பாடு விதிக்கப்பட்டுள்ளது.

தேர்தல் மூலம் தேர்ந்தெடுக்கப்பட்ட இளைஞர் காங்கிரஸ் மாநில நிர்வாகிகளுக்கு டெல்லியில் பயிற்சி முகாம் நடந்தது. அதை தொடர்ந்து பாராளுமன்ற தொகுதி வாரியாக பயிற்சி முகாம்கள் நடந்து வருகிறது.

ஆனால் இந்த முகாம்களுக்கு பலரும் வராமல் டிமிக்கி அடித்து விட்டனராம். இதனால் முகாம்கள் தோல்வியைத் தழுவியுள்ளன.

இந்த நிலையில், தென் சென்னை, வட சென்னை, மத்திய சென்னை, திருவள்ளூர், காஞ்சீபுரம், அரக்கோணம், ஸ்ரீபெரும்புதூர், வேலூர் ஆகிய 8 பாராளுமன்ற தொகுதி நிர்வாகிகளுக்கான பயிற்சி முகாம் சென்னை காங்கிரஸ் தலைமையகமான சத்தியமூர்த்தி பவனில் நடந்தது.

அகில இந்திய பொது செயலாளர் கிரண்குமார் ரெட்டி, தமிழக இளைஞர் காங்கிரஸ் தலைவர் யுவராஜா ஆகியோர் கலந்து கொண்டனர். அப்போது, பயிற்சி முகாம்களிலும், தொகுதி ஆலோசனை கூட்டங்களிலும் பங்கேற்காத நிர்வாகிகள் மீது நடவடிக்கை எடுக்க முடிவு செய்யப்பட்டு இருப்பதாக யுவராஜா கூறினார்.

அதை விட முக்கியமாக இந்த முகாமின்போது, இளைஞர் காங்கிரஸ் நிர்வாகிகள் தங்கள் விசிட்டிங் கார்டுகளில் சோனியா, ராகுல் தவிர மற்றவர்களின் படங்களை போடக்கூடாது என்று கிரண்குமார் ரெட்டி எச்சரித்தாராம்.

காங்கிரஸ் தலைவர் சோனியா, இளைஞர் காங்கிரஸ் பொதுச் செயலாளர் ராகுல் காந்தி. இவர்களது படங்களை போடலாம். மற்றவர்களின் படங்களை போட வேண்டாம் என்பதில் தவறில்லை. ஆனால் காமராஜர் ஆட்சியைக் கொண்டு வருவோம், கொண்டு வருவோம் என வாய் கிழிய முழங்கும் காங்கிரஸார், அவரது படத்தைக் கூட தங்களது விசிட்டிங் கார்டில் போட அனுமதி இல்லாவிட்டால் எப்படி என்கிறார்கள் பழுத்த காங்கிரஸார் வேதனையுடன்.