கருணாநிதி, சோனியாவுக்கு எதிராக கனடா இந்திய துணைத் தூதரகம் முன்பு ஆர்ப்பாட்டம்

டோரன்டோ: தமிழக முதல்வர் கருணாநிதி, காங்கிரஸ் தலைவர் சோனியா காந்திக்கு எதிராக கனடா இந்திய துணைத் தூதுவர் அலுவலகத்தின் முன்பு கண்டன ஆர்ப்பாட்டம் நடைபெற்றது.

நாம் தமிழர் இயக்கம் (கனடா), தமிழ்ப் படைப்பாளிகள் கழகம், கனடிய தமிழ் சமூகம், கனடிய மாணவர் சமூகம் ஆகிய அமைப்புகள் சேர்ந்து ரொரன்ரோ நகரில் உள்ள இந்திய துணைத் தூதுவர் அலுவலகத்தின் முன்பு கண்டன ஆர்ப்பாட்டம் நடத்தினர்.

தமிழ் தேசிய உணர்வை வெளிப்படுத்தும் முழக்க அட்டைகளையும், நாம் தமிழர் கட்சி நிறுவனர் சீமானின் படத்தையும் தாங்கிய வண்ணம் நடைபாதையின் இரு மருங்கிலும் தமிழ் உணர்வாளர்கள் நிறைந்து இருந்தனர். மேலும், பலர் புலிக் கொடிகளை ஆங்காங்கே பறக்கவிட்டபடி இருந்தனர்.

இந்த ஆர்பாட்டத்தில் தமிழக முதல்வர் கருணாநிதியையும், இந்திய காங்கிரஸ் தலைவி சோனியா காந்தியையும் கண்டித்து கோஷங்கள் எழுப்பினர்.