தீபாவளிக்குள் சவரன் ரூ 16000-ஐத் தொடும் அபாயம்!

மும்பை: இனி தங்கம் விலை உயர்வு என்று வரும் செய்திகளைப் பார்த்து அதிர்ச்சியடையாமல் இருக்கப் பழகிக் கொள்ள வேண்டும் நடுத்தர மக்கள்.

தங்கம் விலை எக்கச்சக்கமாய் ஏறுவதும், பின்னர் லேசாகக் குறைவதும், அடுத்த சில தினங்களில் மீண்டும் தாறுமாறாக உயர்வதுமான மோசடி கடந்த சில ஆண்டுகளாகத் தொடர்கிறது.

இந்தப் போக்கு இனி வரும் நாட்களில் இன்னும் அதிகரிக்கும் என்றும், ஒரு சவரன் தங்கத்தின் விலை தீபாவளிக்குள் ரூ 16000 ஆயிரத்தைத் தாண்டும் என்றும் வர்த்தகர்கள் கணித்துள்ளனர்.

மும்பை சந்தையில் இப்போது 10 கிராம் தங்கம் (99.5 சதவீதம்) 18,910-க்கும், 100 சதவீத சுத்த தங்கம் 19,000-க்கும் விற்பனையாகிறது.

வரும் தீபாவளிக்கும் 10 கிராம் தங்கம் 20 ஆயிரத்தை தாண்டும் என்று 'தி பாம்பே புல்லியன் அசோசியேஷன்ஸ்' சங்க தலைவர் சுரேஷ் தெரிவித்தார்.

விநாயகர் சதுர்த்தி, தசரா, தீபாவளி பண்டிகைகள் அடுத்தடுத்து வருவதால் தங்கம் விற்பனை அதிகரிக்கும். இதனால், தங்கத்தின் தேவை அதிகமாகி விலை உயரும் என்று அவர் மேலும் கூறினார்.

சென்னை சந்தையில் இப்போதைய நிலவரப்படி தங்கம் பவுனுக்கு (8 கிராம்) 14,128-க்கும், ஒரு கிராம் 1,766-க்கும் விற்பனையாகிறது.

தீபாவளி பண்டிகையின்போது பவுன் 16,000-ஐ எட்டும் என்று கணக்கிடப்பட்டுள்ளது.