தமிழக காங். தலைவர் தங்கபாலு திடீர் டெல்லி பயணம்

சென்னை: தமிழக காங்கிரஸ் தலைவர் தங்கபாலு திடீரென இன்று டெல்லிக்குக் கிளம்பிச் சென்றார்.

காங்கிரஸ் கட்சியின் தலைவராக மீண்டும் சோனியா காந்தி தேர்வு செய்யப்படவுள்ளார். அவரது பெயரை முன்மொழிந்து வேட்பு மனு தாக்கல் செய்ய அனைத்து மாநில காங்கிரஸ் தலைவர்களும் டெல்லியில் குவிகிறார்கள். இதற்காகவே தங்கபாலு டெல்லி சென்றுள்ளதாக கூறப்படுகிறது.

அதேசமயம், தமிழக காங்கிரஸ் கட்சிக்குள் கடும் கோஷ்டிப் பூசல் மூண்டுள்ளது. குறிப்பாக தங்கபாலுவைக் குறி வைத்து இளங்கோவன் கோஷ்டியினர் குதித்துள்ளனர். கடும் மோதல் மூண்டு வருகிறது. சமீபத்தில் கோவையைச் சேர்ந்த சில இளங்கோவன் ஆதரவாளர்களை தங்கபாலு சஸ்பெண்ட் செய்தார்.

இதனால் கொதிப்படைந்த அவர்கள் தங்கபாலு போகும் இடமெல்லாம் போராட்டம் நடத்தப் போவதாக கூறியுள்ளனர்.

இதுதவிர வாசன், இளங்கோவன் ஆகியோர், விஜயகாந்த்துடன் ஆலோசனை நடத்தியதும், விஜயகாந்த் பிறந்தநாளன்று அவரைப் போய் பார்த்து மாலை அணிவித்து விஜயகாந்த் ஒரு நல்ல தலைவர் என்று இளங்கோவன் பாராட்டியதும் காங்கிரஸுக்குள்ளேயே சில குழப்பத்தை ஏற்படுத்தியுள்ளது.

இப்படி கோஷ்டிப் பூசலும் தலை விரித்தாடுவதால் இதுகுறித்து மேலிடத்தில் தங்கபாலு புகார் செய்யலாம் என எதிர்பார்க்கப்படுகிறது.

இதன் காரணமாக தங்கபாலுவின் டெல்லி பயணம் எதிர்பார்ப்புகளை ஏற்படுத்தியுள்ளது.