புதிய தமிழகம் அதிமுக கூட்டணியில் நீடித்தால் நாங்கள் விலகுவோம்-பார்வர்ட் பிளாக்

தேனி : அதிமுக கூட்டணியில் தொடர்ந்து புதிய தமிழகம் நீடித்தால் நாங்கள் அங்கிருந்து விலகி விடுவோம் என்று அகில இந்திய பார்வர்ட் பிளாக் கட்சி கூறியுள்ளது.

அதிமுக கூட்டணியில் இடம் பெற்றுள்ள குட்டிக் கட்சிகளில் ஒன்று பார்வர்ட் பிளாக். இக்கட்சி தற்போது கூட்டணியிலிருந்து விலகப் போவதாக மிரட்டியுள்ளது.

இக்கட்சியின் மாநில நிர்வாகிகள் கூட்டம், தேனி மாவட்டம் சுருளி அருவிப் பகுதியில் உள்ள திருமண மண்டபத்தில் நடந்தது.

இக் கூட்டத்தில் நிறைவேற்றப்பட்ட தீர்மானங்கள்:

அகில இந்திய அளவில் 13 மாநிலங்களில் அகில இந்திய பார்வர்டு பிளாக் கட்சியின் கொடியில் புலி சின்னமும் அதன் வால் பகுதியில் அரிவாள் சுத்தியல் நட்சத்திரம் உள்ளது. அது போல தமிழகத்திலும் மாற்றி தேசிய அளவில் ஒரே கொடி, ஒரே சின்னம் என வைத்துக்கொள்ள வேண்டும்

முல்லைபெரியாறு அணை அருகே புதிய அணை கட்டும் கேரள அரசின் நடவடிக்கைகளை மத்திய அரசு உடனே தடுக்க வேண்டும்.

புதிய தமிழகம் கட்சியுடனும், அதன் தலைவர் டாக்டர் கிருஷ்ணசாமியுடனும் அ.தி.மு.க. கூட்டணி வைத்துக்கொள்ளக்கூடாது. இது தொடர்பாக அ.தி.மு.க. தலைமைக்கு தெரியப்படுத்தி உள்ளோம். புதிய தமிழகம் கட்சி அ.தி.மு.க. கூட்டணியில் நீடித்தால் அகில இந்திய பார்வர்டுபிளாக் கட்சி அ.தி.மு.க. கூட்டணியிலிருந்து வெளியேறும் என்று தெரிவிக்கப்பட்டுள்ளது.