அதிமுக இளைஞர் பாசறை: வெங்கடேஷ் ராஜினாமா- புதிய செயலாளர் கலைராஜன்

சென்னை: அதிமுக இளைஞர் பாசறை, இளம்பெண்கள் பாசறை செயலாளராக இருந்து வந்த சசிகலாவின் உறவினர் டாக்டர் வெங்கடேஷ் ராஜினாமா செய்துவிட்டதாகவும், அந்தப் பொறுப்பில் வி.பி.கலைராஜன் நியமிக்கப்படுவதாகவும் அதிமுக பொதுச் செயலாளர் ஜெயலலிதா அறிவித்துள்ளார்.

போயஸ் கார்டனில் மிகுந்த செல்வாக்குடன் வலம் வந்த வெங்கடேஷ் சமீபகாலமாக ஒதுக்கப்பட்டு வந்தார். இந் நிலையில் அவர் வகித்து வந்த பதவி கலைராஜன் வசம் சென்றுள்ளது.

இது தொடர்பாக ஜெயலலிதா வெளியிட்டுள்ள அறிக்கையில்,

அதிமுக இளைஞர் பாசறை, இளம்பெண்கள் பாசறை செயலாளராக இதுவரை செயல்பட்டு வந்த டாக்டர் எஸ்.வெங்கடேஷ் தான் வகித்து வரும் பொறுப்பில் இருந்து ராஜினாமா செய்ய விரும்புவதாகத் தெரிவித்துள்ளதால் அவரது ராஜினாமா ஏற்றுக் கொள்ளப்படுகிறது.

அதிமுக இளைஞர் பாசறை, இளம்பெண்கள் பாசறை செயலாளர் பொறுப்பில் வி.பி.கலைராஜன் நியமிக்கப்படுகிறார். இணைச் செயலாளர்களாக பி.தண்டபாணி, ஆர்.எஸ்.முத்துசாமி, துணைச் செயலாளர்களாக ஜி.பழனிவேல், பி.மனோகரன் ஆகியோர் நியமிக்கப்படுகிறார்கள் என்று கூறப்பட்டுள்ளது.