கோவை, தர்மபுரி மருத்துவமனைகளில் ஐடி ரெய்டு

கோவை: கோவை மற்றும் தர்மபுரி மாவட்டங்களில் உள்ள பல்வேறு தனியார் மருத்துவமனைகளில் வருமான வரித்துறையினர் அதிரடி சோதனையில் ஈடுபட்டனர். நோயாளிகளிடம் வசூலிக்கப்படும் கட்டணத்தில் பெருமளவில் இவர்கள் முறைகேடு செய்து வந்ததாக புகார்கள் குவிந்ததைத் தொடர்ந்து இந்த ரெய்டு நடத்தப்பட்டது.

இங்குள்ள தனியார் மருத்துவமனைகள் பல நோயாளிகளிடம் பல கோடி அளவுக்கு கட்டணம் என்ற பெயரில் வசூலிக்கின்றன. ஆனால் வருமான வரித்துறைக்கான கணக்குகளை லட்சங்களில்தான் காட்டுகின்றனர். இதுதொடர்பாக பல்வேறு புகார்கள் குவிந்தன. இதையடுத்து வருமான வரித்துறையினர்தனியார் மருத்துவமனைகளை கட்டம் கட்டி கண்காணித்தனர்.

நேற்று அதிரடி சோதனையில் குதித்தனர். கோவையில் உள்ள ராமகிருஷ்ணா, குறிஞ்சி, கொங்குநாடு ஆகிய தனியார் மருத்துவமனைகள், டயாபடீஸ் சென்டர், சோனா ஸ்கேன் சென்டர் ஆகிய இரு தனியார் மருத்துவ மையங்களிள் சோதனை நடந்தது. அப்போது பல ஆவணங்கள் பறிமுதல் செய்யப்பட்டன.

தர்மபுரியில் உள்ள ஆர்.கே. மருத்துவமனை மற்றும் கிருஷ்ணன் என்பவருடைய குழந்தைகள் நல மருத்துவமனைகளில் 11 பேர் கொண்ட வருமான வரித்துறை குழு சோதனை நடத்தியது.

சம்பந்தப்பட்ட மருத்துவமனைகளின் தலைவர்கள் உள்ளிட்ட நிர்வாகிகளின் இல்லங்களிலும் அதிகாரிகள் சோதனை நடத்தினர்.