வாசன் கோஷ்டிக்கு எதிராக சத்தியமூர்த்தி பவனில் ப.சிதம்பரம் கோஷ்டியினர் போராட்டம்

சென்னை: ஜி.கே.வாசன் கோஷ்டிக்கு எதிராக சென்னை சத்தியமூர்த்தி பவன் காங்கிரஸ் தலைமையகத்தில் ப.சிதம்பரம் கோஷ்டியினர் ஆர்ப்பாட்டம் நடத்தினர். இதனால் அங்கு போலீஸார் குவிக்கப்பட்டனர்.

சென்னை சைதாப்பேட்டையில், இளைஞர் காங்கிரஸ் உறுப்பினர்களுக்கு புகைப்பட அடையாள அட்டை வழங்கும் விழா சில நாள்களுக்கு முன்பு நடைபெற்றது. அதில் வாசன் ஆதரவாளர்கள் பெருமளவில் பங்கேற்றனர்.

அதற்கு சிதம்பரம் ஆதரவாளரான சைதாப்பேட்டை சட்டப் பேரவைத் தொகுதி இளைஞர் காங்கிரஸ் தலைவர் முத்தமிழ் எதிர்ப்பு தெரிவித்தார். இதனால் கூட்டத்தில் தகராறு ஏற்பட்டது.

இதையடுத்து முத்தமிழ் மீது வாசன் ஆதரவாளர்கள் சைதாப்பேட்டை காவல் நிலையத்தில் புகார் கொடுத்தனர். அதைத் தொடர்ந்து இளைஞர் காங்கிரஸ் கூட்டங்களுக்கு பாதுகாப்பு வழங்குமாறு சென்னை மாநகர காவல் ஆணையர் ராஜேந்திரனிடம் மாநில இளைஞர் காங்கிரஸ் தலைவர் யுவராஜா மனு கொடுத்தார்.

முத்தமிழை கைது செய்யக்கோரி வாசன் ஆதரவாளர்கள் சைதாப்பேட்டை காவல் நிலையத்தை முற்றுகையிட்டு போராட்டம் நடத்தினர். இதையடுத்து அவர்கள் 64 பேர் கைது செய்யப்பட்டு பின்னர் விடுவிக்கப்பட்டனர்.

இந்த நிலையில் முத்தமிழ் இளைஞர் காங்கிரஸ் கட்சியிலிருந்து சஸ்பெண்ட் செய்யப்பட்டார். இதனால் சிதம்பரம் ஆதரவாளர்கள் கடும் கோபமடைந்தனர்.

நேற்று நூற்றுக்கணக்கான ஆட்டோக்கள், மோட்டார் சைக்கிள்களில் சத்தியமூர்த்தி பவனுக்கு வந்த அவர்கள் அங்கு யுவராஜுக்கு எதிராக போராட்டத்தில் குதித்தனர்.

இது குறித்து தென் சென்னை மக்களவைத் தொகுதி இளைஞர் காங்கிரஸ் தலைவர் ஜேம்ஸ் பிரகாஷ் கூறுகையில், இளைஞர் காங்கிரஸ் மாநிலத் தலைவர் யுவராஜா ஒருதலைபட்சமாக செயல்படுகிறார். இளைஞர் காங்கிரஸ் கூட்டங்களில் கட்சியின் மற்ற நிர்வாகிகள் கலந்து கொள்ளக்கூடாது என்று அவர் எங்களுக்கு சுற்றறிக்கை அனுப்பினார்.

அதை மீறி சைதாப்பேட்டை கூட்டத்தில் கட்சியின் மற்ற நிர்வாகிகள் பங்கேற்றனர். அதனை தட்டிக் கேட்ட முத்தமிழ் தாற்காலிகமாக நீக்கப்பட்டுள்ளார். இதைக் கண்டித்தும் எங்களுக்கு நீதி வழங்குமாறும் வலியுறுத்தியே முற்றுகை போராட்டம் நடத்துகிறோம் என்றார்.

சிதம்பரம் கோஷ்டியினரின் இந்தப் போராட்டத்தால் பரபரப்பும், பதட்டமும் ஏற்பட்டது. இதையடுத்து போலீஸார் குவிக்கப்பட்டனர். இருப்பினும் அடிதடி, கலவரம் ஏதும் நடக்கவில்லை.