தமிழக சட்டமன்றத் தேர்தல்: தயாராக பாஜக தேர்தல் குழு அமைப்பு

சென்னை: தமிழக சட்டமன்ற தேர்தலுக்கான யுக்திகளை வகுக்கவும், வேட்பாளர்களை தேர்வு செய்யவும் பாஜக தேர்தல் குழு அமைக்கப்பட்டுள்ளது.

மாநிலத் தலைவர் பொன்.ராதாகிருஷ்ணன் தலைமையில் இந்தக் குழு நியமிக்கப்பட்டுள்ளது. இது குறித்து பொன்.ராதாகிருஷ்ணனே விடுத்துள்ள அறிக்கையில்,

நடைபெற இருக்கின்ற சட்டமன்ற தேர்தலை எதிர்கொள்ளும் வகையில் தமிழக பாஜக தன்னை தயார்படுத்தி வருகிறது. இதன் ஒரு பகுதியாக மாநில தேர்தல் குழு அமைக்கப்பட்டுள்ளது.

மத்திய தலைமைக்கு வேட்பாளர்களை பரிந்துரைப்பது, தேர்தல் யுக்திகளை வகுப்பது உள்ளிட்ட தேர்தல் சம்மந்தமான பல்வேறு முக்கிய பணிகளை மேற்கொள்ளும் இக்குழுவில் இடம்பெறுவோர் விபரம் வருமாறு:

மாநில தலைவர் பொன்.ராதாகிருஷ்ணன், தேசிய செயற்குழு உறுப்பினர்கள் இல.கணேசன், சுகுமாரன் நம்பியார், லலிதா குமாரமங்கலம், முன்னாள் மாநில தலைவர் கே.என்.லட்சுமணன், மாநில துணைத் தலைவர்கள் எச்.ராஜா, டாக்டர் தமிழிசை சவுந்தரராஜன், எம்.சின்ராஜ் (கோவை),

மாநில பொதுச் செயலாளர்கள் எஸ்.மோகன்ராஜூலு, சேலம் வி.ரமேஷ், ராமநாதபுரம் சுப.நாகராஜன், தூத்துக்குடி சரவண பெருமாள், மாநில செயலாளர் மதுரை எஸ்.சுரேந்திரன், மாநில மகளிர் அணித் தலைவி நாமக்கல் தமிழிசை யோகம், தேசிய பொதுக்குழு உறுப்பினர் வேலூர் கே.ராஜேந்திரன் ஆகியோர் இடம் பெற்றுள்ளனர் என்று கூறப்பட்டுள்ளது.