சீனாவுக்கு 30 க்யூபிக் பில்லியன் கேஸ் தரும் ரஷ்யா!

பெய்ஜிங்: ஆண்டுக்கு 30 பில்லியன் க்யூபிக் மீட்டர் எரிவாயு சப்ளை செய்வதற்கான ஒப்பந்தத்தில் ரஷ்யாவும் சீனாவும் கையெழுத்திட்டுள்ளன. 2015-ம் ஆண்டு முதல் இந்த ஒப்பந்தம் நடைமுறைக்கு வருகிறது.

சர்வதேச அளவில் மிகுந்த முக்கியத்துவம் வாய்ந்ததாகக் கருதப்படும் இந்த ஒப்பந்தம், ரஷ்ய அதிபர் டிமிட்ரி மெட்வதேவ், சீன அதிபர் ஹீ ஜிண்டாவ் முன்னிலையில் கையெழுத்தானது. ரஷ்யாவின் காஸ்ப்ரம் நிறுவனமும் சீன தேசிய பெட்ரோலியம் கார்ப்பரேஷனும் இதில் கையெழுத்திட்டன.

ஆனால் இதற்கான விலை இன்னமும் நிர்ணயிக்கப்படவில்லை. ஒரு க்யூபிக் மீட்டர் எரிவாயுக்கு 150 டாலர் வரை விலை இருக்கலாம் என சீனத் தரப்பில் சொல்லப்பட்டாலும், இதற்கு ரஷ்யா இன்னமும் ஒப்புக் கொள்ளவில்லை.

இந்த ஒப்பந்தப்படி ஆண்டுக்கு 30 பில்லியன் க்யூபிக் மீட்டர் எரிவாயுவை அடுத்த 30 ஆண்டுகளுக்கு ரஷ்யா வழங்கும். எரிபொருள் தட்டுப்பாடு சீனாவை பாதிக்காமல் இருக்க ரஷ்யா செய்யும் உதவி இது என்றும், சீனப் பொருளாதாரத்தை மேலும் வலுப்படுத்த இந்த ஒப்பந்தம் உதவும் என்று அதிபர் ஹூ ஜிண்டாவ் தெரிவித்தார்.