பிக் பாஸ் ரியாலிட்டி ஷோவில் பாக். பிரபலங்கள்-சிவசேனா, ராஜ் தாக்கரே எதிர்ப்பு

மும்பை: நடிகர் சல்மான் கான் தொகுத்து வழங்கும் பிக் பாஸ் ரியாலிட்டி ஷோவில் பாகிஸ்தானைச் சேர்ந்தவர்கள் பங்கு பெறுவதற்கு சிவசேனா கட்சியும், ராஜ்தாக்கரேவின் மகாராஷ்டிர நவ நிர்மான் சேனா கட்சியும் கடும் எதிர்ப்பு தெரிவித்துள்ளன.

பிக் பாஸ் என்ற நிகழ்ச்சியின் நான்காவது அத்தியாயம் தொடங்கியுள்ளது. இதில் கசாப்பின் முன்னாள் வக்கீல் அப்பாஸ் கஸ்மி, பாகிஸ்தானைச் சேர்ந்த நடிகை வீணா மாலிக், பாகிஸ்தான் டிவி ஷோவை தொகுத்து வழங்கும் நவஜீஸ் அலி உள்ளிட்டோர் பங்கு பெறுகின்றனர்.

இதில் பாகிஸ்தானைச் சேர்ந்த வீணா மற்றும் நவஜீஸ் அலி பங்கு பெறுவதற்கு சிவசேனாவும், மகாராஷ்டிர நவ நிர்மான் சேனாவும் எதிர்ப்பு தெரிவித்துள்ளன.

இதுகுறித்து சிவசேனா செய்தித் தொடர்பாளர் சஞ்சய் ராத் கூறுகையில்,பாகிஸ்தான் கலைஞர்களுடன் இந்நிகழ்ச்சியை நடத்த அனுமதிக்க மாட்டோம்.

பாகிஸ்தானியர்களை இந்நிகழ்ச்சியில் பங்கேற்க அனுமதி அளித்தால் அஜ்மல் கசாப், அப்சல் குரு ஆகியோரையும் போட்டியாளர்களாக அனுமதிக்கலாம்.

பாகிஸ்தானில் இந்தியக் கலைஞர்களுக்கு முக்கியத்துவம் அளிக்கப்படுவதில்லை. இந்திய சேனல்களும் அங்கு தடை செய்யப்பட்டுள்ளன. இந்தியத் தொலைக்காட்சிகளில் மட்டும் பாகிஸ்தானியர்கள் எதற்கு என்றார்.