ஷாப்பிங் போகணும்-இந்திப் படம் பார்க்கணும்: பாக். வீரர்களின் ஆசை!

டெல்லி: காமன்வெல்த் போட்டியில் கலந்துகொள்ள டெல்லி வந்துள்ள பாகிஸ்தான் வீரர்களுக்கு விளையாடுவதை விட ஷாப்பிங் போவதிலும், இந்திப் படம் பார்ப்பதிலும்தான் பெரும் ஆர்வம் காணப்படுகிறது.

டெல்லியின் புகழ் பெற்ற சாந்தினி செளக்கில் சுற்றி வருவதும், இந்திப் படம் பார்ப்பதையும், இந்திய உணவு வகைகளை ஒரு கை பார்ப்பதிலும் அவர்கள் படு ஆர்வமாக உள்ளனராம். வாய்ப்பு கிடைத்தால் இதையெல்லாம் செய்து விட துடியாய் துடிக்கிறார்களாம்.

இதுகுறித்து பாகிஸ்தான் ஹாக்கி அணியின் நட்சத்திர வீரர் ரெஹான் பட் கூறுகையில்,இந்தியாவிலிருந்து வரும்போது மறக்காமல் ஒரு நல்ல சேலை வாங்கி வர வேண்டும் என எனது மனைவி கேட்டுக் கொண்டுள்ளார். குறிப்பாக சாந்தினி செளக்கிலிருந்துதான் சேலை வாங்க வேண்டும் எனவும் அன்புக் கட்டளையிட்டுள்ளார்.

எனக்கும் கூட அஞ்சனா அஞ்சனி படத்தைப் பார்க்க ஆவலாக உள்ளது. பார்க்கலாம், டைம் கிடைத்தால்தான் இதையெல்லாம் செய்ய முடியும் என்றார்.

இன்னொரு ஹாக்கி வீரரான அப்துல் ஹசீம் கான் கூறுகையில், இந்திய, பாகிஸ்தானிய மார்க்கெட்களுக்கிடையே நிறைய வித்தியாசம் இல்லை. இங்கு கிடைப்பதெல்லாம் அங்கும் கிடைக்கத்தான் செய்கிறது. இருந்தாலும் இந்தியாவிலிருந்து எதையாவது வாங்கிக் கொண்டு போக விரும்புகிறேன்
என்றார்.

அதேசமயம், டெல்லி தங்களுக்குப் புதிது என்பதால் விரும்பிய இடத்திற்குப் போவது சிரமம் என்றும் வீரர்கள் கருதுகிறார்கள். அதேசமயம் டெல்லியில் செய்யப்பட்டுள்ள பாதுகாப்பு ஏற்பாடுகள் தங்களை வெகுவாக கவர்ந்துள்ளதாக தெரிவித்துள்ளனர்.