ஷீலா தீட்சித்தை இழிவாகப் பேசிய நியூசிலாந்து டிவி தொகுப்பாளர் பால் ஹென்றி ராஜினாமா

டெல்லி: டெல்லி முதல்வர் ஷீலா தீட்சித் குறித்தும், இந்தியர்கள் குறித்தும் மிகவும் இழிவாகவும், இனவெறியுடனும் பேசிய நியூசிலாந்து டிவி தொகுப்பாளர் பால் ஹென்றி நியூசிலாந்து டிவி (NZTV) நிறுவனத்திலிருந்து விலகியுள்ளார்.

ஷீலா தீட்சித்தின் பெயரை எப்படி உச்சரிக்க வேண்டும் என்று இனவெறியுடனும், இழிவாகவும் பேசியிருந்தார் பால் ஹென்றி. அதேபோல இந்தியர்களையும் படு கேவலமாக விமர்சித்திருந்தார். இதற்கு இந்திய அரசு கடும் எதிர்ப்பு தெரிவித்தது. இதையடுத்து இந்தியாவிடம், நியூசிலாந்து பகிரங்க மன்னிப்பு கேட்டது. அதேசமயம், பால் ஹென்றி மீது நியூசிலாந்து அரசால் நேரடியாக நடவடிக்கை எடுக்க முடியாது என்றும் அது கூறியது.

இந்த நிலையில் தற்போது தனது வேலையை விட்டு விலகியுள்ளார் ஹென்றி. அதுகுறித்து அவர்கூறுகையில், எனது கருத்துக்கள் இரு நாடுகளுக்கிடையே பெரும் பிரச்சினையாகியிருப்பது எனக்கு வியப்பாக உள்ளது. ஒரு கட்டுப்பாட்டுக் கோட்டுக்குள்தான் நான் நடந்து வருகிறேன். சில நேரங்களில் நான் அதிலிருந்து வெளியே போயிருக்கலாம்.

நியூசிலாந்து நாட்டில் இனவெறி பிரச்சினை பெரிதாக நான் காரணமாக இருக்க விரும்பவில்லை. எனவே நான் எனது பதவியை ராஜினாமா செய்கிறேன் என்று கூறியுள்ளார் ஹென்றி.

ஆனால் தான் பேசிய பேச்சுக்காக ஷீலா தீட்சித்திடமோ, இந்திய அரசிடமோ, நியூசிலாந்து அரசிடமோ இந்த பால் ஹென்றி வருத்தமோ, மன்னிப்போ கேட்கவில்லை என்பது குறிப்பிடத்தக்கது.