மத்திய அமைச்சரவை மாறுகிறது... இளைஞர்களுக்கு வாய்ப்பு!

டெல்லி: விரைவில் மத்திய அமைச்சரவை மாற்றியமைக்கப்படுகிறது. இதில் இளம் எம்பிக்கள் சிலருக்கு அமைச்சர் பதவி அளிக்க பிரதமர் மன்மோகன் சிங் திட்டமிட்டுள்ளார்.

மன்மோகன் சிங் வருகிற 24-ந்தேதி ஜப்பான் மற்றும் மலேசியா நாடுகளுக்கு சுற்றுப்பயணம் செய்கிறார். அதற்கு முன்னதாகவே அமைச்சரவையில் இடம்பெறவிருக்கும் எம்பிக்கள் யார் யார் என்று முடிவு செய்துவிடுவார் பிரதமர் என்று காங்கிரஸ் வட்டாரங்கள் தெரிவிக்கின்றன.

மத்திய அமைச்சர்கள் சிலரின் செயல்பாடுகள் பிரதமர் மன்மோகன் சிங்குக்கு கடும் அதிருப்தியை ஏற்படுத்தி உள்ளது. இதுகுறித்து அவர் காங்கிரஸ் தலைவர் சோனியா காந்தியுடன் ஆலோசனை நடத்தி வருகிறார் பிரதமர்.

மன்மோகன் சிங் வெளிநாடு சென்று திரும்பியதும் நவம்பர் 5-ந் தேதி அமெரிக்க அதிபர் ஒபாமா இந்தியா வருகிறார். நவம்பர் 9-ந்தேதி பாராளுமன்ற குளிர்கால கூட்டத்தொடர் தொடங்குகிறது. இந்த முக்கிய நிகழ்வுகள் முடிந்ததும் அமைச்சரவை மாற்றத்தை அறிவிக்கிறார் பிரதமர்.

இப்போதுள்ளவர்களில் அமைச்சர்கள் ஜெயபால் ரெட்டி, எம்.எஸ். கில் ஆகியோர் மாற்றப்படலாம் என்று கூறப்பட்டது. ஆனால் ஜெயபால்ரெட்டி ஆந்திர மாநிலம் தெலுங்கானா பகுதியைச் சேர்ந்தவர். எனவே அவரை மாற்றினால், அதே பகுதியைச் சேர்ந்த ஒருவருக்கு அமைச்சர் பதவி தந்தாக வேண்டும் மன்மோகன் சிங்.

மத்திய சுற்றுச்சூழல் மந்திரி ஜெயராம் ரமேஷ், ஹாண்டிக் ஆகியோரின் செயல்பாடுகளிலும் பிரதமருக்கு திருப்தி இல்லையாம்.

மம்தா பானர்ஜியின் திரிணாமுல் காங்கிரஸ் கட்சிக்கு மேலும் ஒரு அமைச்சர் பதவி வழங்க பிரதமர் முடிவு செய்துள்ளார். அந்த கட்சியின் கொறடா சுதிப்பண்டோவத்யாயாவுக்கு இந்த முறை வாய்ப்புக் கிடைக்கலாம்.

பல்வேறு மாநிலங்களில் கட்சி மேலிட பொறுப்பாளர்களாக இருப்பவர்களும் அமைச்சர்களாக இருக்கின்றனர். ஒருவருக்கு ஒரு பதவி என்ற முறையில் இவர்கள் மந்திரி பதவிகளில் இருந்து விடுவிக்கப்படலாம் என்று தெரிகிறது. அப்படி நடந்தால் குலாம் நபி ஆசாத், பிரிதிவிராஜ் சவுகான், வீரப்ப மொய்லி ஆகியோர் பதவியை இழப்பார்கள். அல்லது கட்சி மேலிட பதவியில் இருந்து விடுவிக்கப்படுவார்கள்.

இன்னும் சில ஜூனியர் அமைச்சர்கள் செயல்பாடுகளும் சொல்லிக் கொள்கிறமாதிரி இல்லாததால் அவர்களும் நீக்கப்படும் நிலை ஏற்பட்டுள்ளது.

அதே நேரம் சிலஸ அமைச்சர்களின் இலாகாக்களையும் மாற்றியமைக்க உள்ளார் பிரதமர். தேசியவாத காங்கிரஸின் பிரபுல் பட்டேல் தற்போது விமான போக்குவரத்து அமைச்சராக உள்ளார். இவருக்கு வர்த்தகத் துறை ஒதுக்கப்படலாம்.