தனியார் பள்ளி கல்விக் கட்டணத்தை இணையதளத்தில் வெளியிட வேண்டும்: மாணவர்-பெற்றோர் கூட்டமைப்பு தீர்மானம்

சென்னை: அரசு நிர்ணயித்துள்ள தனியார் பள்ளிகளின் கல்விக் கட்டணத்தை அனைவரும் அறியும் வகையில் இணையதளத்தில் வெளியிட வேண்டும். தவறும் பட்சத்தில் அந்தப் பள்ளிகள் மீது கடும் நடவடிக்கை எடுக்க வேண்டும், என்று மாணவர்-பெற்றோர் கூட்டமைப்பு தீர்மானம் நிறைவேற்றி உள்ளது.

இதைத் தொடர்ந்து கல்விக் கட்டண விவரங்களை வெளியிடாத சில தனியார் பள்ளிகளுக்கு தமிழக கல்வித் துறை அதிகாரிகள் நோட்டீஸ் அனுப்பியுள்ளனர்.

தமிழ் நாட்டில் உள்ள தனியார் பள்ளிகளில் அதிக கட்டணம் வசூலிப்பதாக வந்த புகார்களை அடுத்து, தமிழக அரசு நீதிபதி கோவிந்தராஜன் கமிட்டியை அமைத்து கல்விக் கட்டணத்தை நிர்ணயித்தது.

ஆனால் தனியார் பள்ளிகளோ எப்பொழுதும் போல் அதிகக் கட்டணம் வசுலித்து வருவதாக புகார்கள் வருகின்றன. அவ்வாறு அதிகக் கட்டணம் வசூலிக்கும் பள்ளிகளின் மீது இதுவரை எந்த நடவடிக்கையும் எடுக்கவில்லை என்று பெற்றோர்கள் தொடர்ந்து புகார் கூறுகின்றனர்.

இதற்காகவே பெற்றோர்கள் தமிழ்நாடு மாணவர்-பெற்றோர் நலச் சங்கங்களின் கூட்டமைப்பை ஏற்படுத்தியுள்ளனர். அவர்களும் கல்விக் கட்டணத்திற்காக போராட்டங்களும், ஆர்ப்பாட்டங்களும் நடத்தி அலுத்துவிட்டனர். இந்நிலையில் இந்த கூட்டமைப்பின் ஆலோசனை கூட்டம் சென்னை தியாகராய நகரில் உள்ள நவபாரத் மெட்ரிக்குலேஷன் பள்ளியில் நேற்று நடந்தது.

அப்போது நிறைவேற்றப்பட்ட தீர்மானங்கள்:

அரசு நிர்ணயித்துள்ள தனியார் பள்ளிகளின் கல்விக் கட்டணத்தை அனைவரும் அறியும் வகையில் இணையதளத்தில் வெளியிட வேண்டும்.

இந்தப் புதிய கட்டண விவரங்களை அனைத்து பள்ளிகளில் உள்ள தகவல் பலகைகளில் வெளியிட வேண்டும்.

அரசு நிர்ணயித்துள்ள கட்டணத்தை பின்பற்றாத பள்ளிகளை அரசே நடத்தும் என்று அறிவிக்க வேண்டும்.

விளக்கம் கேட்டு நோட்டீஸ்!

கல்விக் கட்டண விவரங்களை பள்ளி தகவல் பலகையில் வெளியிடாத சென்னை சி.ஐ.டி. நகர் ஆல்பா மெட்ரிக் மேல்நிலைப் பள்ளி, அண்ணா நகர் ஜெசி மோசஸ் பள்ளி, கீழ்ப்பாக்கம் பெயின் மெட்ரிக் மேல்நிலைப் பள்ளி, ஆழ்வார்திருநகர் செயின்ட் ஜான்ஸ் பள்ளி ஆகிய 4 பள்ளிகளுக்கு மாவட்ட முதன்மை கல்வி அதிகாரிகள் விளக்கம் கேட்டு நோட்டீஸ் அனுப்பி உள்ளனர்.

தமிழகத்தில் பெரும்பாலான பள்ளிகள் தங்கள் தகவல் பலகைகளில் கல்விக் கட்டணத்தை வெளியிடவில்லை என்பது குறிப்பிடத்தக்கது.