மேலும் 9 ஆயிரம் ஆசிரியர்களை நியமிக்கும் தமிழக அரசு

சென்னை: வரும் டிசம்பர் மாதத்துக்குள் மேலும் 9 ஆயிரம் ஆசிரியர்களை நியமிக்கிறது தமிழக அரசு.

அரசு பள்ளிகளில் ஆசிரியர் பணி இடங்கள் வேலைவாய்ப்பு அலுவலக பதிவுமூப்பு அடிப்படையில் நிரப்பப்பட்டு வருகின்றன. இந்த கல்வி ஆண்டுக்கு ஒதுக்கீடு செய்யப்பட்ட 1,800 இடைநிலை ஆசிரியர் பணி இடங்கள், மத்திய இடைநிலை கல்வி திட்டத்தில் (ஆர்.எம்.எஸ்.ஏ.) 1,400 பட்டதாரி ஆசிரியர் இடங்கள், பொதுவான 4 ஆயிரம் பட்டதாரி ஆசிரியர் பணி இடங்கள், 900 முதுநிலை பட்டதாரி 835 உடற்கல்வி ஆசிரியர் பணி இடங்கள் (மொத்தம் 8,935) ஆகியவற்றை நிரப்ப தீவிர நடவடிக்கைகள் எடுக்கப்பட்டு வருகின்றன.

ஆசிரியர் பணிக்காக ஏற்கனவே 22 ஆயிரம் பேருக்கு சான்றிதழ் சரிபார்ப்பு செய்யப்பட்டு அவர்களின் பதிவுமூப்புப் பட்டியல் தயாராக உள்ளது.

இந்த பட்டியலில் இருந்தே மேற்கண்ட ஆசிரியர் காலி இடங்களை நிரப்பவும், பணி நியமன பணிகளை டிசம்பர் மாதத்திற்குள் முடிக்க அரசு முடிவு செய்திருப்பதாக பள்ளிக்கல்வித்துறை அதிகாரிகள் தெரிவித்தனர். உடற்கல்வி ஆசிரியர் பதவிக்கு தேர்வு செய்யப்பட்டோர் பட்டியல் இந்த வாரத்திற்குள் வெளியிடப்படும் என்று ஆசிரியர் தேர்வு வாரிய அதிகாரி தெரிவித்தார்.