ஜப்பான், மலேசியா, வியட்நாமில் 7 நாள் சுற்றுப்பயணம்-கிளம்பினார் மன்மோகன் சிங்

டெல்லி: ஜப்பான், மலேசியா, வியட்நாமில்7 நாள் பயணமாக கிளம்பியுள்ளார் பிரதமர் மன்மோகன் சிங்.

இந்த பயணத்தின்போது பல்வேறு வர்த்தக ஒப்பந்தங்கள் கையெழுத்தாகவுள்ளன. முதலில் ஜப்பானிலும், பின்னர் மலேசியாவிலும், கடைசியாக வியட்நாமிலும் சுற்றுப்பயணம் செய்கிறார் பிரதமர்.

வியட்நாமில் நடைபெறும் ஆசியான்-இந்தியா மற்றும் கிழக்கு ஆசிய மாநாடுகளில் அவர் பங்கேற்கிறார். ஹனாயில் (வியட்நாம்) நடைபெறும் மாநாட்டின்போது சீனப் பிரதமர் வென்ஜியாபோவையும், பிற தலைவர்களையும் அவர் சந்திப்பார்.

முதல் கட்டமாக ஜப்பானில் 2 நாள் பயணம் செய்கிறார் பிரதமர். அப்போது ஜப்பான் பிரதமர் நவோட்டா கானுடன் இருதரப்பு விவகாரங்கள் குறித்து ஆலோசனை நடத்துகிறார். சிவில் அணு சக்தி ஒப்பந்தம் குறித்தும் பேச்சுவார்த்தை நடைபெறவுள்ளது.

பாதுகாப்பு ஒத்துழைப்பு, பொருளாதார உறவுகள் குறித்தும் முக்கியப் பேச்சுக்கள் நடைபெறவுள்ளன.