உணவுப் பணவீக்கம் 13.75 சதவீதமாகக் குறைந்தது!

டெல்லி: உணவுப் பணவீக்கம் 13.75 சதவீதமாகக் குறைந்துள்ளது. அக்டோபர் 16-ம் தேதியுடன் முடிந்த வாரத்தில் காய்கறிகள் மற்றும் வெங்காயத்தின் விலை குறைந்ததால் பணவீக்கத்தில் இந்த மாறுதல் ஏற்பட்டதாக தெரிவிக்கப்பட்டுள்ளது.

தொடர்ந்து இரண்டாவது வாரமாக உணவுப் பணவீக்கம் குறைந்து வருகிறது.

இதற்கு முந்தைய வாரத்தில் 15.53 சதவீதமாக இருந்தது பணவீக்கம். இதில் 1.78 சதவீதமளவுக்கு சரிவு ஏற்பட்டுள்ளது குறிப்பிடத்தக்கது.

கரீப் பருவத்து விளைச்சல் சந்தைக்கு வரத் துவங்கிவிட்டதாலும் இந்த விலைக்குறைவு ஏற்பட்டிருப்பதாக அரசுத் தரப்பு அறிக்கையில் கூறப்பட்டுள்ளது.

அதேநேரம், பருப்பு வகைகள், பால் பொருட்களின் விலை இன்னும் அதிகமாகவே உள்ளது. பருவமழை இந்த சீஸனில் சீராக இருந்தால் மேலும் விலைகள் குறையும் என்று நிபுணர்கள் தெரிவித்துள்ளனர்.