டாக்டர் ராமதாஸின் தம்பி, நவ.7ல் மகனுடன் காங்.கில் இணைகிறார்

திண்டிவனம்: பாமக நிறுவனர் டாக்டர் ராமதாஸின் தம்பியான சீனிவாச கவுண்டர் தனது மகன் சந்திரசேகரனுடன் நவம்பர் 7ம் தேதி காங்கிரஸ் கட்சியில் இணைவதாக தெரிவித்துள்ளார்.

டாக்டர் ராமதாஸின் தம்பி சீனிவாச கவுண்டர். இப்படி ஒருவர் இருப்பதே பாமக வட்டாரத்தைத் தாண்டி மற்றவர்களுக்கு அதிகம் தெரியாது. அந்த அளவுக்கு சீனிவாசகவுண்டரின் இருப்பு வெளிச்சத்திற்கு வராமலேயே இருந்துள்ளது.

சமீபத்தில் தானும், தனது மகனும் தொடர்ந்து ராமதாஸ் குடும்பத்தாரால் கட்சியில் புறக்கணிக்கப்பட்டு வருவதாகவும், தங்களுக்கு கட்சியில் உரிய மரியாதையும், கெளரவமும் தரப்படுவதில்லை என்றும் சீனிவாச கவுண்டரும், சந்திரசேகரனும் குற்றம் சாட்டியிருந்தார்கள். மேலும் தாங்கள் விரைவில் காங்கிரஸில் சேரப் போவதாகவும் கூறியிருந்தார் சந்திரசேகரன்.

இந்த நிலையில், தங்கபாலு முன்னிலையில், நவம்பர் 7ம் தேதி காங்கிரஸ் கட்சியில் இணையவுள்ளதாக சந்திரசேகரன் தெரிவித்துள்ளார். தன்னுடன் தனது ஆதரவாளர்கள் பெரும் திரளாக காங்கிரஸில் சேரவுள்ளதாகவும் அவர் தெரிவித்துள்ளார்.