8.58 சதவீதமாகக் குறைந்த பணவீக்கம்!

டெல்லி: அக்டோபர் மாதத்தில் நாட்டின் ஒட்டு மொத்த பணவீக்கம் 8.58 சதவீதமாகக் குறைந்துள்ளது.

மொத்த விலைக் குறியீட்டெண் அடிப்படையில் இந்தியாவில் பணவீக்கம் கணக்கிடப்படுகிறது. கடந்த ஆண்டுவரை இதையே பிரதான விலை அளவுகோலாகக் கொண்டிருந்தது மத்திய புள்ளி விவரத்துறை.

ஆனால் நடைமுறை விலைக்கும்,. பணவீக்கக் குறியீட்டுக்கும் சம்பந்தமே இல்லாத ஒரு தோற்றம் இருந்ததால், உணவுப் பொருள்களின் விலைகளைக் கொண்டு மட்டும் கணக்கிடப்படும் முறையை நடைமுறைக்குக் கொண்டு வந்தனர்.

இப்போது உணவுப் பணவீக்கமே விலைநிலையை அறிவதற்கான பிரதான கருவியாக எடுத்துக் கொள்ளப்பட்டு வருகிறது. இந்த மாத நிலவரப்படி உணவுப் பணவீக்கம் 14.13 சதமாக இருந்தது.

ஆனால் ஒட்டு மொத்த பணவீக்கம் எந்த அளவு உள்ளது என்ற விவரம் தெரிவிக்கப்படவில்லை. இப்போது அந்த விவரத்தை மத்திய அரசு வெளியிட்டுள்ளது.

அதன்படி 8.58 சதவீதமாக உள்ளது பொதுப் பணவீக்கம். செப்டம்பரில் இது 8.62 சதவீதமாக இருந்தது. ஆனால் இதுவே கடந்த ஆண்டு 1.48 சதவீதம்தான் (ஆனால் அன்றைக்கும் விலை உச்சத்தில்தான் இருந்தது)!

நாட்டின் ஒட்டு மொத்த பணவீக்கம் இப்போது ஓரளவு கட்டுப்பாடான நிலையில்தான் உள்ளது. விரைவில் இது 6.5 சதவீதமாகக் குறையும் என நம்புவதாக, பிரதமரின் பொருளாதார ஆலோசகர் ரங்கராஜன் தெரிவித்துள்ளார்.