விண்ணைத் தொடும் விமான கட்டணம்: டெல்லி-மும்பைக்கு ரூ 35000!

டெல்லி: இந்திய உள்ளூர் விமானக் கட்டணம் இதுவரை காணாத அளவுக்கு பெரும் உயர்வை எட்டியுள்ளது.

டெல்லியிலிருந்து மும்பைக்கு திடீரென கிளம்ப வேண்டிய நிர்ப்பந்தத்தில் உள்ளவர்கள் ஒரு வழிக் கட்டணமாக மட்டும் எகானமி வகுப்பில் ரூ 16000 முதல் 20000 வரையும், எக்ஸிகியூடிவ் வகுப்பில் ரூ 35000 வரையும் செலுத்த வேண்டும்!

இது இந்தியாவிலிருந்து துபாய் அல்லது நார்வேக்கு சென்றுவருவதற்கு ஆகும் கட்டணத்துக்கு இணையானது.

நாடு முழுக்க உள்ள பல்வேறு நகரங்களுக்குச் செல்லும் விமானங்களின் கட்டணங்கள் 25 சதவீதம் வரை இந்த சீஸனில் உயர்த்தப்பட்டுள்ளன. ஆனால் மும்பை- டெல்லி இடையிலான கட்டணம் இதுவரை காணாத ஒன்று என்று பயணிகள் கடுப்புடன் தெரிவிக்கின்றனர்.

ரூ 13000 முதல் 16000 வரை வாங்கிக் கொண்டிருந்த குறைந்த கட்டண விமானங்களிலும் இப்போது ரூ 22000 வரை வசூலிக்கப்படுவது, கிறுகிறுக்க வைத்துள்ளது.

அப்படியும் கூட விமானங்களில் இடம் கிடைத்தபாடில்லையாம். ஸ்பைஸ்ஜெட், இன்டிகோ, கோ ஏர் போன்ற விமானங்களில் டிக்கெட்டே கிடைக்காத நிலை உள்ளதாம். சென்னை, பெங்களூர் போன்ற முக்கிய நகரங்களிலும் கிட்டத்தட்ட இதே நிலைதான்.

இன்னொரு பக்கம் மும்பை மற்றும் டெல்லி விமான நிலையங்களில் விமானங்கள் நிறுத்க் கூட இடமில்லாத அளவுக்கு டிராபிக் அதிகரித்துள்ளது. மும்பை விமான நிலையத்தில் ஷெட்யூல்படி ஒரு நாளைக்கு 513 விமானங்கள் வந்து செல்ல வேண்டும். ஆனால் 490 விமானங்கள் வந்து செல்லவே டிராபிக் அனுமதிக்கிறதாம்.

இதனால் பல விமானங்கள் திடீர் ரத்தும், பயணிகள் அவதியும் தவிர்க்க முடியாததாகியுள்ளது. இதனால் மும்பையின் மெயின் ரன்வே சனி, ஞாயிறு மற்றும் திங்கள் கிழமைகளில் 8 மணிநேரம் மூடப்பட்டது!