கர்நாடக சட்டசபையைக் கலைக்க காங்கிரஸ் கோரிக்கை

பெங்களூர்: இனியும் ஆட்சியில் நீடிக்கும் அருகதையை எதியூரப்பா அரசு இழந்து விட்டது. எனவே சட்டசபையைக் கலைக்க அவர் உடனடியாக பரிந்துரைக்க வேண்டும் என்று கர்நாடக காங்கிரஸ் கட்சி கோரியுள்ளது.

இதுகுறித்து கர்நாடக சட்டசபை எதிர்க்கட்சித் தலைவர் சித்தராமையா செய்தியாளர்களிடம் பேசுகையில், இந்த அரசு மக்களின் நம்பிக்கையை இழந்து விட்டது. இனியும் இது நீடிக்கக் கூடாது. வரலாறு காணாத ஊழல் புகார்கள் இந்த அரசு மீது குவிந்து கொண்டிருக்கிறது. எதியூரப்பா அரசில் உள்ள அனைத்து அமைச்சர்களுக்கும் ஊழலில் பங்கு உள்ளது.

எதியூரப்பாவை முதல்வர் பதவியிலிருந்து அகற்ற பாஜக மேலிடம் தவறினால், எதியூரப்பா அரசை எதிர்த்து மாநிலம் தழுவிய போராட்டம் வெடிக்கும்.

அரசு நிர்வாகம் சீர்குலைந்து போய் விட்டது. தனது ஆட்சியில் பொருளாதார நிலை சிறப்பாக இருப்பதாக எதியூரப்பா கூறுவது பொய். பிறகு ஏன் அரசு ரூ. 8000 கோடி அளவிலான பில்களை பாஸ் செய்யாமல் நிறுத்தி வைத்திருக்கிறது என்றார் அவர்.