கடந்த தேர்தலை விட 21 இடங்கள் கூடுதலாக பெற்ற பாஜக!
பாட்னா: கடந்த சட்டசபைத் தேர்தலை விட இந்த முறை கூடுதலாக 21 இடங்களைப் பெறுகிறது பாஜக. அதேசமயம், நிதிஷ்குமாரின் ஐக்கிய ஜனதாதளம் கடந்ததேர்தலை விட 12 இடங்களே அதிகம் பெறுவது குறிப்பிடத்தக்கது.
கடந்த 2005ல் நடந்த பீகார் தேர்தலில் ஐக்கிய ஜனதாதளம், பாஜக கூட்டணிக்கு மொத்தம் 143 இடங்கள் கிடைத்தன. இதில் ஐக்கிய ஜனதாதளத்திற்கு 88 இடங்களும், பாஜகவுக்கு 55 இடங்களும் கிடைத்தன.
தற்போதைய முன்னணி நிலவரப்படி ஐக்கிய ஜனதாதளம் 100 தொகுதிகளிலும் பாஜக 76 தொகுதிகளிலும் முன்னணியில் உள்ளன. அதன்படி இந்த முறை ஐக்கிய ஜனதாதளத்திற்கு 12 தொகுதிகளும், பாஜகவுக்கு 21 தொகுதிகளும் கூடுதலாக கிடைக்கின்றன.
கடந்த முறை லாலு பிரசாத் யாதவ், காங்கிரஸ், சிபிஎம், தேசியவாத காங்கிரஸ் ஆகியவை ஒரே கூட்டணியாக போட்டியிட்டு 65 இடங்களைக் கைப்பற்றினர். இந்த முறை இவர்கள் பிரிந்து நின்றனர்.
கடந்த முறை லாலு கட்சிக்கு 54 சீட்கள் கிடைத்தன. ஆனால் இந்த முறை அது 33 சீட்களே கிடைக்கும். காங்கிரஸ் கட்சி கடந்த முறை 9 இடங்களில் வெற்றி பெற்றது. இந்த முறை 4 தொகுதிகளில் மட்டுமே அது வெல்கிறது.
இந்த தேர்தல் வெற்றிக்கு நிதீஷ்குமார்தான் காரணம் என்றாலும் அதனுடன் இணைந்து கூடுதல் பலன் பெற்றுள்ளது பாஜக என்பது குறிப்பிடத்தக்கது.