டாக்டர் அம்பேத்கர் படத்தை குடும்பத்தோடு பாருங்கள்-வீரமணி வேண்டுகோள்

மதுரை: அம்பேத்கர் திரைப்படத்தை பொது மக்கள் குடும்பத்தோடு பார்க்க வேண்டும் என்று திராவிடர் கழகத் தலைவர் கி. வீரமணி வேண்டுகோள் விடுத்துள்ளார்.

இது குறித்து திராவிடர் கழகத் தலைவர் கி. வீரமணி வெளியிட்டுள்ள செய்திக்குறிப்பில்,

இந்திய அரசமைப்புச் சட்டத்தை உருவாக்கியவர், உலக அறிஞர்களின் பட்டியலில் மிக முக்கிய இடத்தை வகித்தவர், ஒடுக்கப்பட்ட மக்களுக்காக வாழ்நாள் முழுவதும் வாழ்ந்தவர் டாக்டர் அம்பேத்கர்.

இந்து சீர்திருத்தச் சட்டத்தை நிறைவேற்ற முடியாத நிலை வந்த போது, தமது கொள்கை தான் பெரிது - என்று தமது மத்திய சட்ட அமைச்சர் பதவியை ராஜினாமா செய்தவர்.

லண்டனில் நடைபெற்ற வட்ட மேஜை மாநாட்டில் தாழ்த்தப்பட்டோரின் பிரதிநிதி நீங்கள் இல்லை என்று காந்தியிடம் நேருக்கு நேர் விவாதம் செய்தவர் தான் டாக்டர் அம்பேத்கர்.

தந்தை பெரியார், அண்ணல் அம்பேத்கரை பற்றிய உண்மை விவரங்கள் கடைக்கோடி மக்களுக்கும் சென்றடைய இந்தத் திரைப்படம் மிகவும் உதவும்.

தாழ்த்தப்பட்ட, பிற்படுத்தப்பட்ட மற்றும் சிறுபான்மை மக்கள் அனைவரும் இந்த படத்தை பார்ப்பது என்பது அடிப்படையான கடமையாகும் என்று அவர் கூறியுள்ளார்.