திபெத்தில் 100 பில்லியன் டாலர் கனிம இருப்பு-சீனா கண்டுபிடிப்பு

பெய்ஜிங்: சீனாவின் கட்டுப்பாட்டில் உள்ள திபெத்தில் 100 பில்லியன் டாலர் மதிப்புள்ள இயற்கை வளங்களைக் கண்டுபிடித்துள்ளது சீனா.

3000 கனிமப் படுக்கைகள் சமீப காலத்தில் மட்டும் திபெத்தில் கண்டறியப்பட்டுள்ளது.மொத்தம் 102 வகை தாதுக்கள் இந்த படுகைகளில் அபரிமிதமாகக் காணப்படுவதாகக் கூறப்படுகிறது.

இந்த கனிம வளங்கள் உள்ள பகுதிகள் அனைத்தும், Tibet Autonomous Region (TAR) எனப்படும் பகுதியில், இமயமலைச் சாரலில் வருகின்றன. இவை இப்போதும் சர்ச்சைக்குரிய பகுதிகளாகும். 1950 ஆம் ஆண்டுவரை தலாய் லாமா ஆட்சியிலிருந்த இந்தப் பிரதேசத்தை சீனா ஆக்கிரமித்துக் கொண்டுள்ளது.

சீனாவை விட, திபெத்தில் அதிக அளவு க்ரோமியம் மற்றும் குப்ரம் (தாமிர தாதுக்கள்) திபெத் பகுதிகளில் கிடைப்பது குறிப்பிடத்தக்கது.

இதைத் தவிர சீனாவின் மற்ற 12 மாகாணங்களிலும் கனிமத் தாதுக்கள் கண்டறியப்பட்டுள்ளன.

தற்போது கனிமப் படுகைகள் கண்டெடுக்கப்பட்டுள்ள பகுதிகள் அனைத்துமே சீனாவின் மலைப்பாங்கான பகுதிகளில் உள்ளன. இங்கு போக்குவரத்துக்குக் கூட வழி கிடையாது. எனவே இப்போதே பாதைகள் அமைப்பதில் மும்முரம் காட்டுகிறது சீனா.