திண்டிவனம் ராமமூர்த்தி தலைமையிலான தேசியவாத காங்கிரஸ் மாநில கமிட்டி கலைப்பு

By Chakra

Published: Friday, February 11, 2011, 16:29 [IST]

Subscribe to Oneindia Tamil

டெல்லி: திண்டிவனம் ராமமூர்த்தி தலைமையிலான தமிழ்நாடு மாநில தேசியவாத காங்கிரஸ் கமிட்டியை அதன் அகில இந்திய கமிட்டி கலைத்துவி்ட்டது. புதிய நிர்வாகிகள் விரைவில் அறிவிக்கப்படுவார்கள் என்று அறிவிக்கப்பட்டுள்ளது.

கடந்த சட்டசபைத் தேர்தலின்போது காங்கிரஸ் கட்சியிலிருந்து விலகி தனிக் கட்சி ஆரம்பித்தார் திண்டிவனம். இதையடுத்து அதிமுக பொதுச் செயலாளர் ஜெயலலிதாவை சந்தித்து தனது ஆதரவைத் தெரிவித்தார். மேலும் அதிமுக கூட்டணிப் பேச்சுவார்த்தையை ஆரம்பித்தவுடனேயே முதல் ஆளாக அழைக்கப்பட்டவர் திண்டிவனம் தான்.

சீட் கொடுக்கவே கூப்பிடுகிறார்கள் என நினைத்து பெரிய தொகுதிப் பட்டியலோடு போனார் ராமமூர்த்தி. தனது கட்சிக்கு ஒரு 5 சீட் குடுங்க என்று இவர் கேட்க, அப்படியெல்லாம் கேட்கக் கூடாது என்று கூறிவிட்ட ஜெயலலிதா, நல்லா பிரச்சாரம் பண்ணுங்க என்று கூறி திருப்பி அனுப்பிவிட்டார்.

இதையடுத்து சில மாதத்தி்ல் தனது தனிக் கட்சியை ஊத்தி மூடிய ராமமூர்த்தி மத்திய உணவுத்துறை அமைச்சர் சரத் பவார் தலைமையிலான தேசியவாத காங்கிரஸ் கட்சியில் சேர்ந்தார். யாருமே இல்லாத கட்சிக்கு ஓடி வந்த அவருக்கு தமிழக பிரிவின் தலைவர் பதவியைத் தந்தார் பவார்.

தமிழ்நாட்டில் இப்படி ஒரு கட்சி இருப்பதே தெரியாத அளவுக்கு கட்சியை 'பத்திரமாகப்' பார்த்துக் கொண்டார் ராமமூர்த்தி.

இந் நிலையில் ராமமூர்த்தி தலைமையிலான கமிட்டியே கலைக்கப்பட்டு விட்டதாகவும் , புதிய கமிட்டி விரைவில் அறிவிக்கப்படும் என்றும் அந்த கட்சியின் அகில இந்திய கமிட்டி அறிவித்துள்ளது.

கட்சியின் தேசிய பொதுச் செயலாளரும், தமிழ்நாட்டில் இருந்து 3 முறை எம்.பியாக தேர்ந்து எடுக்கப்பட்டவருமான டாக்டர் வி.ராஜேஸ்வரன், தமிழ்நாடு கமிட்டியின் அமைப்பாளராக பணியாற்றுவார் என்றும் கூறியுள்ளது.

கட்சியின்தமிழகத்துக்கான மேலிட பொறுப்பாளரான கோவிந்தராவ் அதிக் கூறுகையில், தேசியவாத காங்கிரஸ் கட்சியில் இருந்து திண்டிவனம் ராமமூர்த்தி நீக்கப்படவில்லை. அவர் உள்பட அவரது தலைமையிலான குழு அனைத்தும் கலைக்கப்பட்டு உள்ளது. கட்சியை வலுப்படுத்துவதற்காகவும், இளைய தலைமுறைக்கும், புதியவர்களுக்கும் வாய்ப்பு கொடுக்கும் வகையிலும் இந்த திடீர் மாற்றத்தை சரத்பவார் மேற்கொண்டுள்ளார்.

ஐக்கிய முற்போக்கு கூட்டணியில் திமுகவும், தேசியவாத காங்கிரசும் இடம் பெற்றுள்ளன. தமிழக சட்டசபை தேர்தலில் தேசியவாத காங்கிரஸ் கட்சியின் ஆதரவு தேவை என திமுக முன்வந்து கோரினால், அதுபற்றி சரத்பவார் பரிசீலித்து உரிய முடிவு எடுப்பார் என்றார்.

தனது தலைமையிலான கமிட்டி கலைப்பட்டதாவது திண்டிவனம் ராமமூர்த்திக்குத் தெரியுமா என்பது தெரியவில்லை..!!

Published On February 11, 2011