சோனியாவுடன் அன்புமணி சந்திப்பு-திமுக கூட்டணியில் பாமக!

By Chakra

Published: Friday, February 18, 2011, 10:15 [IST]

Subscribe to Oneindia Tamil

டெல்லி: காங்கிரஸ் தலைவர் சோனியா காந்தியை பாமக இளைஞரணித் தலைவரும் முன்னாள் மத்திய அமைச்சருமான அன்புமணி சந்தித்து, திமுக-காங்கிரஸ் கூட்டணியில் இடம் பெறுவது தொடர்பாக பேச்சு நடத்தினார்.

திமுக கூட்டணியில் பாமகவை சேர்க்க சோனியா காந்தி எதிர்ப்புத் தெரிவித்துள்ளதாக முதல்வர் கருணாநிதி கூறியிருந்தார். இந் நிலையில் திமுக, அதிமுக என இரு தரப்புடனும் பாமக பேச்சு நடத்தி வந்தது. திமுக கூட்டணியில் சேருவதையே அன்புமணி விரும்புவதாகவும் கூறப்பட்டது.

இதற்காக சோனியாவை சந்தித்து சமாதானப்படுத்த பாமக முயன்று வந்தது. ஆனால், கடந்த 3 வாரங்களாக சோனியாவை சந்திக்க பாமக தரப்புக்கு அப்பாயின்மெண்ட் தரப்படவில்லை.

இந் நிலையில் நேற்று சோனியாவை சந்திக்க அன்புமணிக்கு வாய்ப்பு தரப்பட்டது. இதையடுத்து டெல்லி விரைந்த அன்புமணி சோனியாவுடன் பேச்சு நடத்தினார்.

அப்போது தமிழகத்துக்கான காங்கிரஸ் பொறுப்பாளரான மத்திய அமைச்சர் குலாம் நபி ஆசாத்தும் உடனிருந்தார். இவர் பாமகவை திமுக கூட்டணியில் சேர்க்க ஆர்வம் காட்டி வரும் முக்கியத் தலைவராவார்.

இது மரியாதை நிமித்தமான சந்திப்பு என்று பாமகவும் காங்கிரசும் கூறினாலும் கூட்டணி குறித்தே பேசப்பட்டதாகத் தெரிகிறது. தேர்தலுக்குத் தேர்தல் அணி மாறுவது சரியல்ல என பாமகவிடம் காங்கிரஸ் எடுத்துச் சொன்னதாகவும் தெரிகிறது.

சந்திப்பின்போது தனது சகோதரியின் இல்லத் திருமண பத்திரிக்கையும் சோனியாவிடம் அன்புமணி வழங்கினார். பின்னர் பிரதமர் மன்மோகன் சிங்கையும் நேரில் சந்தித்து அன்புமணி அழைப்பிதழை வழங்கினார்.

முன்னதாக தமிழக சட்டப்பேரவைத் தேர்தலுக்கான காங்கிரஸ் தொகுதிப் பங்கீட்டுக் குழுக் கூட்டம் குலாம் நபி ஆசாத்தின் தலைமையில் நடைபெற்றது. இக் கூட்டத்துக்குப் பின் நிருபர்களிடம் பேசிய தமிழக காங்கிரஸ் தலைவர் தங்கபாலு, திமுக கூட்டணியில் பாமக இணைவதை காங்கிரஸ் வரவேற்பதாகக் கூறினார்.

பாமக விஷயத்தில் காங்கிரஸ் முடிவெடுக்காத வரை கூட்டணி தொடர்பாக அடுத்தகட்டமாக பேச்சுவார்த்தைகள் நகர்வது சாத்தியமில்லை என்று காங்கிரசிடம் திமுக கூறிவிட்டதையடுத்தே அன்புமணியை சோனியா சந்தித்தததாகத் தெரிகிறது.

இதையடுத்து கூட்டணியில் பாமக இடம் பெறும் செய்தி விரைவில் வெளியாகவுள்ளது.

Published On February 18, 2011