மாறத் துடிக்கும் காங்கிரசார்: மாற்றுத் தொகுதி கிடைக்குமா?

நெல்லை: நெல்லை, தூத்துக்குடி மாவட்டங்களில் தொகுதிகளை இழந்த காங்கிரஸ் எம்எல்ஏக்கள் மாற்று தொகுதிகளை கேட்பதில் ஆர்வம் காட்டி வருகின்றனர்.

தமிழக சட்டசபை தேர்தலில் கூட்டணி கட்சிகளுடன் பேச்சுவார்த்தை நடத்த காங்கிரஸ் மேலிடம் ஐவர் குழுவை அமைத்துள்ளது. மத்திய அமைச்சர்களை உள்ளடக்கிய இக்குழுவினர் கடந்த இரு தினங்களாக எம்எல்ஏக்கள், எம்பிக்கள் மற்றும் மாவட்ட தலைவர்களிடம் கருத்து கேட்பு கூட்டங்களை நடத்தி வருகின்றனர். காங்கிரஸ் எம்எல்ஏக்கள் அனைவருமே தாங்கள் வெற்றி பெற்ற தொகுதிகளையே மீண்டும் கேட்டு மனு அளித்துள்ளனர். ஆனால் நெல்லை, தூத்துக்குடி மாவட்டங்களை சேர்ந்த காங்கிரஸ் எம்எல்ஏக்கள் தொகுதிகளை மீண்டும் கேட்பதில் சில சிக்கல்கள் ஏற்பட்டுள்ளது.

சேரன்மகாதேவி, சாத்தான்குளம் உள்ளிட்ட தொகுதிகள் தற்போது தொகுதி மறுசீரமைப்பில் போய் விட்டது. சேரன்மகாதேவி தொகுதியில் உள்ள பகுதிகள் அம்பைக்கும், ஆலங்குளத்திற்கும் சென்று விட்டது. சாத்தான்குளம் தொகுதியின் பல பகுதிகளை ஸ்ரீவைகுண்டமும், திருச்செந்தூரும் சத்தமில்லாமல் விழுங்கி கொண்டு நிற்கின்றன. தொகுதிகளை இழந்த எம்எல்ஏக்கள் மாற்றாக எந்த தொகுதியை கேட்டு பெறுவது என்பதில் சிக்கல் ஏற்பட்டுள்ளது. சேரன்மகாதேவி தொகுதியை இழந்த வேல்துரைக்கு தற்போது அம்பை அல்லது நான்குநேரி தொகுதியில் போட்டியிட விருப்பம் உள்ளது.

ஆனால் அம்பை சபாநாயகர் தொகுதி என்பதாலும், நான்குநேரியில் ஏற்கனவே காங்கிரஸ் எம்எல்ஏ வசந்தகுமார் இருப்பதாலும் வேறு தொகுதிக்காக அவர் போராட வேண்டியுள்ளது. சாத்தான்குளம் தொகுதி ராணி வெங்கடேசன் ஸ்ரீவைகுண்டம் தொகுதியை கேட்டு பெற நினைக்கிறார். ஆனால் அங்கு இருப்பதும் காங்கிரஸ் சுடலையாண்டி எம்எல்ஏ என்பதால் வேறு தொகுதியில் போட்டியிட வாய்ப்பு கிடைக்குமா என ஆலோசனை நடத்தி வருகிறார். சென்னையில் நடந்த மாவட்ட காங்கிரஸ் தலைவர்கள் ஆலோசனை கூட்டத்தில் நெல்லை, தூத்துக்குடி, குமரி மாவட்டத்தில் குறைந்தது 10 தொகுதிகளிலாவது போட்டியிட வேண்டும் என மாவட்ட தலைவர்கள் கோரிக்கை வைத்துள்ளனர்.

1989-ம் ஆண்டில் காங்கிரஸ் தனித்து நின்றபோது நெல்லை மாவட்டத்தில் 5 தொகுதிகளை கைப்பற்றியது. அதன் அடிப்படையில் இம்முறை கடையநல்லூர், நான்குநேரி தொகுதிகளோடு, வாசுதேவநல்லூர், ஆலங்குளம், ராதாபுரம் தொகுதிகளையும் கேட்க மாவட்ட தலைவர்கள் வலியுறுத்தியுள்ளனர்.

English summary

Congress contestants want their constituencies again. Few people face difficulties as some constituencies has been changed after rearrangement. Now the congress functionaries are in a dilemma and they insist the party to get atleast 10 seats in Tirunelveli, Tuticorin and Kanyakumari districts.