நட்சத்திரம் சின்னம் கோரி விடுதலை சிறுத்தைகள் வழக்கு: சிலிண்டர் சின்னம் கோரும் கொ.மு.க

சென்னை: வரும் சட்டசபைத் தேர்தலில் தங்களுக்கு நட்சத்திரம் சின்னம் ஒதுக்கக் கோரி விடுதலை சிறுத்தைகள் கட்சியும், சிலிண்டர் சின்னம் ஒதுக்கக் கோரி கொங்கு நாடு முன்னேற்றக் கழகமும் உச்ச நீதிமன்றத்தில் வழக்குத் தொடர்ந்துள்ளன.

இந்தக் கட்சி கடந்த நாடாளுமன்றத் தேர்தலில் சிதம்பரம், விழுப்புரம் ஆகிய 2 தொகுதிகளில் போட்டியிட்டது. அப்போது நட்சத்திரம் சின்னம் ஒதுக்கப்பட்டது.

அரசியல் கட்சிகள் தேர்தல் ஆணையத்தின் அங்கீகாரம் பெற குறைந்தது 7 சட்டசபை தொகுதிகள், அல்லது 2 நாடாளுமன்றத் தொகுதிகளில் வெற்றி பெற வேண்டும். அப்போது தான் நிரந்தர சின்னம் கிடைக்கும்.

ஆனால், கடந்த நாடாளுமன்றத் தேர்தலில் விடுதலை சிறுத்தைகள் கட்சியின் தலைவர் திருமாவளவன் மட்டுமே சிதம்பரம் தொகுதியில் வெற்றி பெற்றார்.
விழுப்புரம் தொகுதியில் 2,700 ஓட்டு வித்தியாசத்தில் அக்கட்சி தோல்வியடைந்தது.

இதனால் கட்சிக்கு தேர்தல் அங்கீகாரம் கிடைக்கவில்லை. இந் நிலையில் வரும் சட்டசபைத் தேர்தலில் மீண்டும் நட்சத்திரம் சின்னத்திலேயே போட்டியிட அக்கட்சி விரும்புகிறது. தங்களுக்கு அந்த சின்னத்தை ஒதுக்கக் கோரி உச்ச நீதிமன்றத்தில் வழக்குத் தொடர்ந்துள்ளது.

விடுதலை சிறுத்தை கட்சியின் மாநில பொருளாளர் முகமது யூசுப் நட்சத்திரம் சின்னம் கோரி மனு தாக்கல் செய்துள்ளார்.

சிலிண்டர் சின்னம் கோரும் கொங்குநாடு முன்னேற்ற கழகம்:

அதே போல திமுக கூட்டணியில் இடம் பெற்றுள்ள கொங்குநாடு முன்னேற்ற கழகம் தனக்கு சிலிண்டர் சின்னம் ஒதுக்கக் கோரி மனு தாக்கல் செய்துள்ளது.

இந்தக் கட்சிக்கு 7 தொகுதிகள் ஒதுக்கப்பட்டுள்ளன. தனி சின்னத்தில் போட்டியிடப் போவதாக இந்தக் கட்சி அறிவித்துவிட்டது.

கடந்த நாடாளுமன்றத் தேர்தலில் 12 தொகுதிகளில் கொங்குநாடு முன்னேற்ற கழகம் போட்டியிட்டது. அனைத்து தொகுதிகளிலும் சிலிண்டர் சின்னத்தில் போட்டியிட்டு சுமார் 6 லட்சம் வாக்குகளை அந்தக் கட்சி பெற்றது.

இந் நிலையில் சட்டசபை தேர்தலிலும் அதே சின்னத்தில் போட்டியிட விரும்புகிறது.

கொ.மு.க. போட்டியிடும் 7 தொகுதிகளிலும், சிலிண்டர் சின்னம் ஒதுக்க வேண்டும் என்று உச்ச நீதிமன்றத்தில் அக் கட்சியின் பொது செயலாளர் ஈ.ஆர்.ஈஸ்வரன் வழக்குத் தொடர்ந்துள்ளார்.

English summary

The Supreme Court on Thursday will hear a petition filed by the Viduthalai Siruthaigal Katchi (VCK), for a direction to the Election Commission to allot the party the star symbol in the assemblt elections scheduled to be held in Tamil Nadu on April 13.