வட மாவட்டங்களில் எதிர்க்கட்சியினருக்கு தோல்வியே: ராமதாஸ் ஆரூடம்
திருப்போரூர்: காஞ்சிபுரம் உள்ளிட்ட 12 வட மாவட்டங்களில் ஒன்றில் கூட எதிர்க்கட்சியினரால் வெற்றி பெற முடியாது என்று பாமக நிறுவனர் ராமதாஸ் தெரிவித்தார்.
திருப்போரூர் தொகுதியில் பாமக வேட்பாளர் அறிமுகக் கூட்டம் நடந்தது. இதற்கு தொழிலாளர் நலத்துறை அமைச்சர் அன்பரசன் தலைமை தாங்கினார்.
கூட்டத்தில் வேட்பாளரை அறிமுகப்படுத்தி பாமக நிறுவனர் ராமதாஸ் பேசியதாவது,
12 வட மாவட்டங்களில் ஒன்றில் கூட எதிர்க்கட்சியினரால் வெற்றி பெற முடியாது. கிராமத்தில் வசிப்பவர்கள் அந்தந்த ஊர்களி்ல் பணியாற்ற வேண்டும். திமக அரசு அப்படி என்ன செய்துவிட்டது என்று எதிர்கட்சியினர் கேட்கலாம். ஒரு கிலோ அரிசியை ஒரு ரூபாய்க்கு வழங்கி பசி என்னும் கொடிய நோயைப் போக்கியுள்ளது. கடந்த 5 ஆண்டுகளாக மக்களுக்குத் தேவையான அடிப்படை வசதிகளை செய்து கொடுத்துள்ளது. வறுமைக் கோட்டிற்கு கீழ் இருப்பவர்களுக்கு 35 கிலோ அரிசி வழங்கப்போவதாக முதல்வர் தேர்தல் அறிக்கையில் தெரிவித்துள்ளார்.
இவற்றை எல்லாம் நாம் மக்களிடத்தில் எடுத்துச் சொல்ல வேண்டும். கலைஞர் மருத்துவக் காப்பீட்டு திட்டத்தின் மூலம் பயனடைந்த ஸ்ரீரங்கத்தைச் சேர்ந்த ஒருவர் கூறுகையில், எங்கள் குடும்பத்தில் 10 ஓட்டுகள் உள்ளன. நாங்கள் இதுவரை அதிமுகவுக்குத் தான் வாக்களித்தோம். ஆனால் இந்த தடவை திமுகவுக்குத் தான் எங்கள் ஓட்டு என்றார். நம் கூட்டணிக்கு கொத்து கொத்தாய் ஓட்டுகள் விழ வேண்டும். அதற்கேற்றவாறு ஒவ்வொரு தொகுதிக்கும் ஒரு குழு அமைத்து அது அனைத்து வேலைகளையும், பிரச்சனைகளையும் சமாளிக்க வேண்டும். எதிர் அணி இருக்கிறதே என்ற கவலையே வேண்டாம். நம் அணி தான் பலமானது. கருணாநிதி 6வது முறையாக முதல்வராவார் என்று மக்களே சொல்லும் நிலை உள்ளது.
பாமகவுடன் விடுதலைச் சிறுத்தைகள் இருப்பதால் காஞ்சிபுரம் உள்ளிட்ட 12 வட மாவட்டங்களில் ஒன்றில் கூட எதிரணியினர் வெற்றி பெற முடியாது. களப்பணியாளர்கள் 20 பேர் தினமும் மக்களை சந்தித்து பேச வேண்டும். நான் முதன்முறையாக இந்த மாவட்டத்தில் தேர்தல் பிரசாரத்தை துவங்கியுள்ளேன். இத்தொகுதியில் மூன்றாவது முறையாக போட்டியிடும் ஆறுமுகம் குறைந்தது 25 ஆயிரம் ஓட்டு வித்தியாசத்தில் வெற்ற பெற பாடுபட வேண்டும் என்றார்.
கூட்டத்தில் விடுதலைச் சிறுத்தைகள் கட்சி வேட்பாளர்கள் பத்து பேரும், ராமதாசுக்கு சால்வை அணிவித்து, பூங்கொத்து கொடுத்து வாழ்த்து பெற்றனர்.
Click it and Unblock the Notifications
Sign in with Google