5 ஆண்டுகளில் 780 மடங்கு வீங்கிய அமைச்சர் வேலுவின் சொத்து

சென்னை: அமைச்சர் எ.வ.வேலுவின் சொத்து மதிப்பு கடந்த 5 ஆண்டுகளில் 780 மடங்கு அதிகரித்துள்ளது அனைவரையும் வியப்படைய வைத்துள்ளது.

தேர்தலின்போதுதான் ஒவ்வொருவரின் சொத்து விவரமும் மக்களுக்குத் தெரிய வரும். அவர்கள் தாக்கல் செய்யும் சொத்துக் கணக்குகளைப் பார்க்கும் மக்களுக்கு வியப்பு வியப்பாய் வரும். காரணம், அவ்வளவு சுவாரஸ்யமாய் இருக்கும் அவர்கள் கொடுக்கும் தகவல்கள்.

வழக்கமாக சொகுசுக் கார்களில் வலம் வரும், சட்டை கசங்காமல் உலா வரும் பல தலைவர்களும், வேட்பு மனுவுடன் தாக்கல் செய்யும் சொத்துப் பட்டியலில் படு ஏழையாய் காட்சியளிப்பார்கள்.

கையில் காசு கூட இல்லை என்பார்கள், கார் இல்லை என்பார்கள், பைக் இல்லை என்பார்கள், நிலம் இல்லை என்பார்கள். அப்படியே இருப்பதாக கூறினாலும் மனைவி பெயரிலோ, அல்லது பிள்ளைகள் பெயரிலோ இருப்பதாக கணக்கு காட்டியிருப்பார்கள்.

இந்த நிலையில் தமிழக உணவுத்துறை அமைச்சர் வேலுவின் சொத்து மதிப்பு பலரையும் வியப்பில் ஆழ்த்தியுள்ளது. காரணம் அவரது சொத்து மதிப்பு கடந்த 5 ஆண்டுகளில் 780 மடங்கு உயர்ந்து ஓங்கி நிற்பதுதான்.

திருவண்ணாமலை தொகுதியில் போட்டியிடுகிறார் வேலு. கடந்த 2006 சட்டசபைத் தேர்தலின்போது தனது சொத்து மதிப்பு வெறும் ரூ. 1 லட்சம் என்று மட்டுமே காட்டியிருந்தார் வேலு. ஆனால் தற்போது இவரது சொத்து மதிப்பு பல மடங்கு அதிகரித்துள்ளதாக கூறியுள்ளார்.

இவரது பெயரில் வங்கி கணக்கில் மட்டும் ரூ. 17 லட்சம் உள்ளது. விவசாய நிலத்தின் மதிப்பு ரூ. 1.75 என்று காட்டியுள்ளார். வீடுகள் உள்ளிட்ட கட்டடங்களின் மதிப்பு ரூ. 1.25 கோடி என்று கூறியுள்ளார். மனைவியின் நகைகளின் மதிப்பு ரூ. 5.76 லட்சம் என்று காட்டியுள்ளார்.

English summary

In an astonishing revelation in poll-bound Tamil Nadu, a DMK minister's assets multiplied 780 times in the last five years. The man in question is state food minister EV Velu who is contesting from Tiruvannamalai. Velu had declared assets worth one lakh rupees before the 2006 Assembly elections. Now, Velu's assets have multiplied in every form including bank deposits running into Rs 17 lakh and agricultural lands worth Rs 1.75 crore, buildings worth Rs 1.25 crore and his wife's jewellery that costs Rs 5.76 lakh.