ஜெயலலிதாவுக்கு காமெடி ஜோடி சேர்ந்துள்ளது-ஸ்டாலின் தாக்கு

சென்னை: ஜெயலலிதாவுடன் ஒருவர் ஜோடி சேர்ந்துள்ளார். அவர் ஹீரோவாக இருந்து இப்போது காமெடியனாக மாறியவர். நல்லவேளை இப்போது ஜெயலலிதா சினிமாவில் நடித்தபோது அவர் நாயகனாக நடிக்கவில்லை என்று விஜயகாந்த்தை தாக்கியுள்ளார் துணை முதல்வர் மு.க.ஸ்டாலின்.

மு.க. ஸ்டாலின் இன்று தென் சென்னையில் பிரச்சாரம் செய்தார். சேப்பாக்கம்-திருவல்லிக்கேணி தொகுதியில் போட்டியிடும் ஜெ. அன்பழகன், மயிலாப்பூரில் போட்டியிடும் தமிழக காங்கிரஸ் தலைவர் கே.வி. தங்கபாலு ஆகியோரை ஆதரித்து அவர் பேசினார்.

அப்போது அவர் கூறுகையில்,

ஜெயலலிதாவுடன் புதிதாக ஒருவர் ஜோடி சேர்ந்துள்ளார். அவர் கதாநாயகனாக இருந்து வில்லனாக மாறி இப்போது காமெடியன் ஆகிவிட்டார். நல்லவேளை ஜெயலலிதா கதாநாயகியாக நடித்தபோது இவர் இல்லை. இப்போது வடிவேலுதான் ஹீரோவாக உள்ளார்.

ஏதோ தேர்தல் நேரத்திற்காக வருபவர்கள் நாங்கள் அல்ல. எந்த நேரத்திலும் எந்த சூழ்நிலையிலும் எப்படிப்பட்ட நிலையிலும் உங்களுக்கு தொண்டு செய்து உங்களை தேடி பணிபுரிபவர்கள் நாங்கள்.

ஜெயலலிதாவை போல தேர்தல் நேரத்தில் மட்டும் வாய்க்கு வந்தவாறு பேசுகிறவர் நாங்கள் அல்ல. அவர் சென்னைக்கு மட்டும்தான் விமானத்தில் பிரசாரம் செய்ய வரவில்லை. தேர்தல் வந்தால்தான் தமிழ்நாட்டை பற்றி அவருக்கு ஞாபகம் வரும். மற்ற நேரத்தில் கொட நாடுதான் தெரியும்.

வானத்தை கிழிப்போம் வைகுண்டத்தை காட்டுவோம் என்று இப்போது கூறுகிறார். ஆனால் கலைஞர் சொன்னதை செய்து காட்டியவர், செய்யக்கூடியவர். 2006 ம் ஆண்டு கலைஞர் அளித்த வாக்குறுதிகளை நிறைவேற்றினார். அதே போல இப்போது அறிவித்துள்ள வாக்குறுதிகளையும் செய்து கொடுப்பார் என்றார் ஸ்டாலின்.

English summary

Deputy CM M.K.Stalin has hailed Comedy Actor Vadivelu and slammed Actor Vijayakanth. He campaigned in Chennai today. He said, Hero Vijayakanth has now become a comedian but the comedian Vadivelu has become a hero, he said.