சோனியா-கருணாநிதி பிரசார செலவு: திமுக-காங். வேட்பாளர்கள் கணக்கில் சேர்ப்பு

சென்னை: சென்னையில் திமுக கூட்டணி வேட்பாளர்களுக்காக காங்கிரஸ் தலைவர் சோனியா காந்தி டெல்லியிலிருந்து தனி விமானத்தில் வந்து பங்கேற்ற பிரசாரக் கூட்டத்துக்கான செலவுத் தொகை திமுக-காங்கிரஸ் கூட்டணியைச் சேர்ந்த 16 வேட்பாளர்களின் செலவுக் கணக்கில் தலா ரூ.70,000 சேர்க்கப்பட்டுள்ளது.

சட்டசபை தேர்தலில் போட்டியிடும் வேட்பாளர் அதிகபட்சமாக ரூ.16 லட்சம் வரை செலவு செய்ய தேர்தல் ஆணையம் அனுமதி வழங்கியிருந்தது.

வங்கி கணக்கு மூலமே இதை செலவு செய்ய வேண்டும் என்றும் வேட்பாளருக்காக பிரசாரம் செய்ய ஹெலிகாப்டர்களில் வந்து செல்லும் தலைவர்களின் செலவுக் கணக்கும் அந்த வேட்பாளர் கணக்கிலேயே சேர்க்கப்படும் என்றும் அறிவிக்கப்பட்டிருந்தது.

செலவு விவரங்களை தனியாக ஒரு புத்தகத்தில் எழுதி வைத்து தேர்தல் கமிஷனிடம் ஒப்புதல் பெற வேண்டும் என்றும் தேர்தல் கமிஷன் சார்பிலும், வேட்பாளர்களின் செலவு கணக்கு கண்காணிக்கப்படும் என்று அறிவிக்கப்பட்டிருந்தது.

இந் நிலையில் சென்னையில் உள்ள 16 தொகுதிகளில் போட்டியிட்ட வேட்பாளர்கள் தங்கள் செலவு கணக்குகளை தாக்கல் செய்துள்ளனர். இதில் பெரும்பாலான வேட்பாளர்கள் தங்களுக்கு ரூ.4 லட்சம் முதல் 7 லட்சம் வரை செலவு ஆனதாக கணக்கு தாக்கல் செய்துள்ளனர்.

அதே போல தேர்தல் கமிஷனும் ஒவ்வொரு வேட்பாளர்களுக்கான செலவை தனியாக எழுதி வைத்திருந்தது. சில வேட்பாளர்கள் தாக்கல் செய்த செலவு கணக்குக்கும், தேர்தல் கமிஷன் எழுதிய கணக்குக்கும் வேறுபாடு இருந்தது.

சில வேட்பாளர்களிடம் இதை சுட்டிக் காட்டியபோது அதை தங்கள் கணக்கில் சேர்த்துக் கொண்டனர். ஆனால், தேர்தல் கமிஷன் கூறிய செலவு கணக்கை ஏற்காத வேட்பாளர்களுக்கு நோட்டீஸ் அனுப்பப்பட்டுள்ளது.

பிரசாரத்துக்கு பயன்படுத்தப்பட்ட வாகனங்களுக்கான செலவு, தொண்டர்களுக்கு உணவு வழங்கிய செலவு, பொதுக் கூட்ட செலவு, ஒலி பெருக்கி ஆகியவற்றுக்கான செலவு உள்பட பல்வேறு செலவுகளை தேர்தல் கமிஷன் வேட்பாளர்கள் செலவில் சேர்த்துள்ளது.

சென்னையில் திமுக கூட்டணி வேட்பாளர்களுக்காக காங்கிரஸ் தலைவர் சோனியா காந்தி டெல்லியிலிருந்து தனி விமானத்தில் வந்து பங்கேற்ற பிரசாரக் கூட்டம் தீவுத்திடலில் நடந்தது. இதற்கான செலவை இதில் பங்கேற்ற திமுக, காங்கிரஸ் கூட்டணி வேட்பாளர்கள் செலவு கணக்கில் சேர்க்கப்பட்டுள்ளது. அதன்படி ஒவ்வொரு வேட்பாளர்களுக்கும் தலா ரூ.70,000 இந்த கூட்டத்தின் செலவாக சேர்க்கப்பட்டுள்ளது.

அதே போல முதல்வர் கருணாநிதி, அயனாவரம், சிந்தாதிரிப்பேட்டை ஆகிய இடங்களில் பங்கேற்ற பொதுக்கூட்ட செலவு இந்தக் கூட்டங்களில் பங்கேற்ற வேட்பாளர்கள் செலவுக் கணக்கில் தலா ரூ.30,000 வீதம் சேர்க்கப்பட்டுள்ளது.

அதிமுக கூட்டணி வேட்பாளர்களுக்காக அந்தக் கட்சியின் பொதுச் செயலாளர் ஜெயலலிதா செய்த தேர்தல் பிரசார செலவு அந்த கூட்டணி கட்சி வேட்பாளர்களின் செலவு கணக்கில் சேர்க்கப்பட்டுள்ளது.

English summary

Congress president Sonia Gandhi and DMK chief Karunanidhi's campaign expenses have been included in the DMK-congress alliance candidates' expediture list. Likewise, ADMK leader Jayalalitha's campaign expenses are included in her party candidates' account.