மீண்டும் பாஜகவில் இணைந்தார் உமாபாரதி

டெல்லி: 2005ம் ஆண்டு ஒழுங்கு நடவடிக்கையின் கீழ் பாஜகவை விட்டு வெளியேற்றப்பட்ட உமா பாரதி இன்று மீண்டும் கட்சியில் இணைந்தார். கட்சித் தலைவர் நிதின் கத்காரி முன்னிலையில் அவர் மீண்டும் பாஜகவில் இணைந்தார்.

டெல்லியில் செய்தியாளர்களிடம் உமா பாரதி மீண்டும் சேர்ந்த தகவலை அவருடன் சேர்ந்து வெளியிட்டார் கத்காரி. பின்னர் அவர் செய்தியாளர்களிடம் பேசுகையில்,

உமா பாரதியின் வருகையை வரவேற்கிறோம். அவரது வருகையால் பாஜக பலம் பெறும். உ.பியில் அடுத்த ஆண்டு வரும் சட்டசபைத் தேர்தலில் பாஜகவை பலம் பொருந்திய கட்சியாக மாற்றும் பொறுப்பு உமா பாரதியிடம் ஒப்படைக்கப்பட்டுள்ளது என்றார்.

பாஜகவிலிருந்து நீக்கப்பட்ட பின்னர் பாரதிய ஜனசக்தி கட்சி என்ற புதிய கட்சியைத் தொடங்கி நடத்தி வந்தார் உமா பாரதி. முன்பு இவர் மத்தியப் பிரதேச மாநில முதல்வராகவும் இருந்தவர். தேசிய ஜனநாயகக் கூட்டணி ஆட்சியில் மத்திய அமைச்சராகவும் இருந்துள்ளார் உமாபாரதி.

அயோத்தியில் பாபர் மசூதி இடிக்கப்பட்ட விவகாரத்தில் முக்கியமானவர் உமா பாரதி என்பது குறிப்பிடத்தக்கது.

English summary

Uma Bharti has been reinducted into the BJP today. Bharti was expelled for indiscipline and for defying the BJP's central leadership in December 2005. She then launched her own party -- the Bharatiya Janshakti Party -which had virtually no impact on voters. She has also served as a union minister in the NDA government.