உலக வங்கி தலைவர்: ஹிலாரி கிளின்டன் விருப்பம்!

வாஷிங்டன்: அமெரிக்க வெளியுறவுச் செயலராக பதவி வகிக்கும் ஹிலாரி கிளிண்டன், விரைவிலேயே இந்தப் பதவியிலிருந்து விலகி, உலக வங்கித் தலைவராக விருப்பம் தெரிவித்துள்ளதாக செய்திகள் வெளியாகியுள்ளன.

ஒபாமா அரசில் வெளியுறவுச் செயலராக உள்ளார் ஹிலாரி கிளிண்டன். ஆனால் இந்தப் பதவியில் நான்கு ஆண்டுகளுக்கு மேல் இருக்க விரும்பவில்லை என அவர் தெரிவித்துள்ளார்.

அடுத்த ஆண்டு உலக வங்கியின் தலைவர் பதவியிலிருந்து ஓய்வு பெறுகிறார் ராபர்ட் ஜோல்லிக். இவருக்குப் பின் அந்தப் பதவிக்கு வர ஹிலாரி வெளிப்படையாக விருப்பம் தெரிவித்துள்ளார்.

அவரது இந்த விருப்பத்தை அமெரிக்க அதிபர் பாரக் ஒபாமாவும் ஆதரிக்கிறாராம். அதேநேரம், இந்த ஆதரவை அவர் வெளிப்படையாகக் காட்டி, ஹிலாரியை உலக வங்கித் தலைவர் பதவிக்கு நியமிப்பாரா எனத் தெரியவில்லை. இன்னொன்று உலக வங்கியில் உறுப்பினராக உள்ள 187 நாடுகளும் இந்த நியமனத்தை அங்கீகரிக்க வேண்டும் என்பது குறிப்பிடத்தக்கது.

இதுகுறித்து ஹிலாரியின் செயலரிடம் கேட்டபோது, இதுபற்றி கருத்து கூற விரும்பவில்லை, என்றார்.

ஒருவேளை ஹிலாரி கிளிண்டன் உலக வங்கித் தலைவராக தேர்வானால், அவரது வெளியுறவுச் செயலர் பதவிக்கு ஒபாமாவுக்கு நெருக்கமான செனட்டர் ஜான் கெர்ரி தேர்வு செய்யப்படக்கூடும் எனத் தெரிகிறது.

English summary

She has said publicly she did not plan to stay on at the State Department for more than four years. Associates say Clinton has expressed interest in having the World Bank job should the Bank's current president, Robert Zoellick, leave at the end of his term, in the middle of 2012.