ஜூலை 23, 24ல் கோவையில் திமுக செயற்குழு, பொதுக்குழு கூட்டம்: அன்பழகன் அறிவிப்பு

சென்னை: வரும் ஜூலை 23, 24 ஆகிய தேதிகளில் திமுக செயற்குழு மற்றும் பொதுக்குழு கூட்டங்கள் கோவையில் உள்ள அறிஞர் அண்ணா வளாகத்தில் நடைபெறும் என்று அக்கட்சியின் பொதுச் செயலாளர் க. அன்பழகன் தெரிவித்துள்ளார்.

இது குறித்து அவர் வெளியிட்டுள்ள அறிக்கையில்,

வரும் ஜூலை மாதம் 23-ம் தேதி மாலை 4 மணி அளவில் திமுக செயற்குழுக் கூட்டமும், மறுநாள்(24-ம் தேதி) காலை 10 மணிக்கு திமுக பொதுக்குழு கூட்டமும் கோவை மாநகர், திருச்சி ரோடு, சிங்காநல்லூர் உழவர்சந்தை அருகில் உள்ள அறிஞர் அண்ணா வளாகத்தில் நடைபெறும். இந்த இரண்டு கூட்டங்களும் தலைவர் கருணாநிதி தலைமையில் நடக்கும்.

இந்த கூட்டங்களில் தலைமைச் செயற்குழு மற்றும் பொதுக்குழு உறுப்பினர்கள் அனைவரும் தவறாது கலந்து கொள்ளுமாறு கேட்டுக் கொள்கிறேன். இதில் கட்சி ஆக்கப் பணிகள் குறித்து ஆலோசிக்கப்படவுள்ளது என்று அதில் கூறப்பட்டுள்ளது.

சட்டசபைத் தேர்தலில் பெற்ற பெரும் தோல்விக்குப் பின்னர் திமுக கூட்டும் முதல் செயற்குழு, பொதுக் குழுக் கூட்டம் இது என்பதால் திமுகவினர் மத்தியில் பெரும் எதிர்பார்ப்பை ஏற்படுத்தியுள்ளது.

English summary

DMK general secretary K. Anbazhagan has announced that the party executive body meeting and general council meeting will be held on july 23 and 24 in Coimbatore. He has asked the functionaries to attend the meetings without fail.