மாஜி திமுக எம்.எல்.ஏ. வி.எஸ். பாபு, தம்பி, அண்ணன் மகன் திமுக பதவிகளை உதறினர்

By Siva

Published: Monday, July 11, 2011, 13:42 [IST]

Subscribe to Oneindia Tamil

சென்னை: வடசென்னை மாவட்ட திமுக செயலாளர் வி.எஸ். பாபு கட்சிப் பொறுப்பில் இருந்து விலகியுள்ளார். இது தவிர வி.எஸ். பாபுவின் தம்பி, அவரது அண்ணன் மகன் ஆகியோரும் தங்கள் பதவிகளை ராஜினாமா செய்துள்ளனர்.

வடசென்னை மாவட்ட திமுக செயலாளராக இருந்தவர் வி. எஸ். பாபு. புரசைவாக்கம் தொகுதி திமுக எம்.எல்.ஏவாகவும் வலம் வந்தவர். வட சென்னை திமுகவில் முக்கிய பிரமுகராகவும் திகழ்ந்தவர். கடந்த திமுக ஆட்சிக்காலத்தின்போது நடந்த சென்னை மாநகராட்சித் தேர்தலின்போது வாக்குச் சாவடிகளில் நடந்த கலவரங்களில் முக்கியப் பங்காற்றியவர் இவர்.

அவருக்கு அன்மையில் நடந்து முடிந்த சட்டசபை தேர்தலில் சீட் கொடுக்கப்படவில்லை.

இருப்பினும் அதைப் பொருட்படுத்தாமல், அவர் கொளத்தூர் பகுதியில் போட்டியிட்ட மு.க. ஸ்டாலினுக்கு ஆதரவாக தேர்தல் வேலை செய்தார். இருப்பினும் ஸ்டாலின் மிகக் குறைந்த ஓட்டு வித்தியாசத்தில் ஜெயித்ததால் வி. எஸ். பாபு மீது திமுக நிர்வாகிகளுக்கு அதிருப்தி ஏற்பட்டதாகக் கூறப்படுகின்றது.

மேலும், சட்டசபைத் தேர்தலையொட்டி வட சென்னை அதிமுக செயலாளராக இருந்த பி.கே.சேகர் பாபு திமுகவுக்குத் தாவினார். இதை வி.எஸ்.பாபு விரும்பவில்லை. அப்போது அது குறித்து செய்திகள் வெளியாகின. ஆனால் சேகர் பாபு வருகையால் தான் கவலைப்படவில்லை என்று பாபு சமாளித்திருந்தார்.

இந்த நிலையில், வி.எஸ்.பாபு கட்சிப் பொறுப்பிலிருந்து விலகி விட்டார். வடசென்னை மாவட்ட திமுக செயலாளர் பதவியில் இருந்து விலகுவதாக கட்சி மேலிடத்திற்கு கடிதம் அனுப்பினார். அவரை சமாதானப்படுத்த முயன்ற கட்சியின் மூத்த தலைவர்கள் முயற்சி தோல்வியில் முடிந்தது.

இதையடுத்து தற்போது ஆர்.டி.சேகர் வடசென்னை தி.மு.க. பொறுப்பாளராக நியமிக்கப்பட்டுள்ளார்.

இது ஒரு புறம் இருக்க மறுபுறம் மாநகராட்சி மண்டல தலைவரும் வி.எஸ். பாபுவின் தம்பியுமான வி.எஸ். ரவி மற்றும் கொளத்தூர் பகுதி இளைஞர் அணி அமைப்பாளரும் பாபுவின் அண்ணன் மகனுமான வி.எஸ்.ஜே.சீனிவாசன் ஆகியோரும் தங்கள் பதவிகளை ராஜினாமா செய்துள்ளனர்.

ஒரே நேரத்தில் வி. எஸ். பாபு, அவரது தம்பி, அண்ணன் மகன் ஆகியோர் தங்கள் பதவிகளை ராஜினாமா செய்துள்ளது திமுக வட்டாரத்தில் பெரும் பரபரப்பை ஏற்படுத்தியுள்ளது.

இவர்கள் அடுத்து என்ன செய்யப் போகிறார்கள், அப்படியே இருப்பார்களா அல்லது அதிமுகவுக்குப் போவார்களா என்ற எதிர்பார்ப்பு எழுந்துள்ளது.

Published On July 11, 2011