விசாரணைக்கு வந்த வீரபாண்டி ஆறுமுகத்துக்கு சல்யூட் அடித்த போலீசார் மாற்றம்

By Siva

Published: Sunday, July 31, 2011, 11:41 [IST]

Subscribe to Oneindia Tamil

சேலம்: போலீஸ் ஸ்டேஷனுக்கு விசாரணைக்கு வந்த திமுக முன்னாள் அமைச்சர் வீரபாண்டி ஆறுமுகத்துக்கு சல்யூட் அடித்து மரியாதை செய்த போலீசார் கூண்டோடு மாற்றம் செய்யப்பட்டுள்ளனர்.

திமுக முன்னாள் அமைச்சர் வீரபாண்டி ஆறுமுகம் மீது நிலமோசடி வழக்கு பதிவு செய்யப்பட்டது. இதையடுத்து அவர் தலைமறைவாகி பின்னர் நீதிமன்றத்தில் சரணடைந்தார். இந்த வழக்கு விசாரணைக்காக காவல் நிலையம் வந்த வீரபாண்டி ஆறுமுகத்துக்கு விஐபி மரியாதை தான்.

வீரபாண்டியார்தான் தங்களுக்கு அமைச்சர் என்று நினைத்து விட்டார்களோ என்னவோ, வீரபாண்டியாரை ராஜ மரியாதையுடன் வரவேற்றனர் போலீஸார்.

அவருக்கு வீட்டு சாப்பாடு கொடுத்து, பார்வையாளர்களை அனுமதித்து இன்னாள் அமைச்சரை விட அதிகப்படியாக கவனித்துக் கொண்டனர்.

இந்த உபச்சாரம் பற்றி உயர் அதிகாரிகளுக்கு தகவல் சென்றது. இதையடுத்து வீரபாண்டி ஆறுமுகத்தை விசாரித்த அதிகாரிகள், அப்போது பாதுகாப்பு பணியில் இருந்தவர்கள் அனைவரும் கூண்டோடு மாற்றப்பட்டுள்ளனர்.

கடந்த 2 நாட்களுக்கு முன்பு சேலம் நகர் சட்டம் ஒழுங்கு துணை ஆணையர் பாஸ்கரன், சென்னை பரங்கி மலைக்கு மாற்றம் செய்யப்பட்டார். அவருக்கு பதிலாக சத்யப்பிரியா நியமிக்கப்பட்டார். அவர் கடந்த 29-ம் தேதி பதவியேற்றார் மறுநாளே வீரபாண்டி ஆறுமுகம் கைது செய்யப்பட்டார்.

அப்போது விசாரணைக்கு வந்த வீரபாண்டி ஆறுமுகத்துக்கு சல்யூட் அடித்த நுண்ணறிவு பிரிவு ஆய்வாளர் அண்ணாதுரை, அழகாபுரம் ஆய்வாளர் கண்ணன் ஆகிய இருவரும் நேற்று (30-ம் தேதி) ராமநாதபுரத்துக்கு மாற்றப்பட்டனர்.

விசாரணையை ஒழுங்காக நடத்தாதற்காகவும், வீரபாண்டி ஆறுமுகத்துக்கு ராஜ மரியாதை கொடுத்ததற்காகவும் உதவி ஆணையாளர் பிச்சை, ஆய்வாளர்கள் சங்கமேஸ்வரன், சீனிவாசன் ஆகிய மூவரும் நேற்று வேறு இடம் ஒதுக்கப்படாமலேயே மாற்றம் செய்யப்பட்டனர்.

இதற்கிடையே, வீரபாண்டி ஆறுமுகம் அமைச்சராக இருக்கையில் அவருக்கு விசுவாசமாக இருந்த போலீஸ் அதிகாரிகள் பட்டியல் தயாரிக்கப்பட்டு வருவதாவும், விரைவில் அவர்கள் தூக்கி அடிக்கப்படுவார்கள் என்றும் கூறப்படுகிறது.

Published On July 31, 2011