ஆப்கானிஸ்தான் ஆளுநர் மாளிகையை தாக்கிய தாலிபான் தீவிரவாதிகள்: 22 பேர் பலி

சாரிகர்: ஆப்கானிஸ்தானின் பர்வான் மாகாண ஆளுநர் மாளிக்கைக்குள் 6 தற்கொலைப்படை தீவிரவாதிகள் நடத்திய தாக்குதலில் 22 பேர் பலியாகினர் என்று அதிகாரிகள் தெரிவித்தனர்.

ஆப்கானிஸ்தான் தலைநகர் காபூலின் வடக்கில் சுமார் 50 கிமீ தொலைவில் உள்ளது சாரிகர். பர்வான் மாகாணத்தின் தலைநகர். இந்த மாகாண ஆளுநரின் மாளிக்கைக்குள் 6 தற்கொலைப்படை தீவிரவாதிகள் நுழைந்தனர். அவர்கள் நடத்திய தாக்குதலில் 22 பேர் பலியாகினர். இதற்கு தாலிபான்கள் பொறுப்பு ஏற்றுள்ளனர்.

இந்த மாகாணத்தில் தான் அமெரிக்கா மற்றும் நேட்டோ படைகளின் விமானத் தளம் உள்ளது.

இந்த மாத துவக்கத்தில் பர்வான் மாகாணத்தில் தாலிபான்கள் ஒரு ஹெலிகாப்டரை சுட்டுத் தள்ளினர். இதில் 38 அமெரிக்கர்கள் மற்றும் ஆப்கானிஸ்தான் படையினர் உயிர் இழந்தனர்.

கடந்த ஜூன் மாத இறுதியில் தலைநகர் காபூலில் உள்ள இன்டர்-கான்டினென்டல் ஹோட்டலில் நடத்தப்பட்ட தாக்குதலில் குறைந்தபட்சம் 21 பேர் பலியாகினர்.

கந்தஹார் மற்றும் ஹெல்மாந்த் போன்றவை தாலிபான்கள் ஆதிக்கத்தில் உள்ள இடங்கள் ஆகும். கிழக்கு பகுதிகள் பாகிஸ்தான் தாலிபான்கள், அல் கொய்தா மற்றும் ஹக்கானி அமைப்பினரின் ஆதிக்கத்தில் உள்ளது.

பர்வான் மாகாண ஆளுநர் மாளிகையில் நடந்த தாக்குதல் குறித்து போலீஸ் அதிகாரிகள் கூறியதாவது,

6 தற்கொலைப் படை தீவிரவாதிகள் ஆளுநர் மாளிகைக்கு வந்தனர். அதில் ஒருவன் கேட்டுக்கு முன்பு கார் வெடிகுண்டை வெடிக்கச் செய்தான். இதில் மாளிகைச் சுவரில் ஓட்டை விழுந்தது. அது வழியாக 5 தீவிரவாதிகள் உள்ளே நுழைந்தனர். அவர்கள் அதி நவீன துப்பாக்கிகள், கிரனேட் போன்றவற்றை வைத்திருந்தனர். அவர்களில் 3 பேரை சுட்டுக் கொன்றோம்.

அந்த நேரத்தில் ஆளுநர் அப்துல் பாசிர் சலாங்கி தலைமை போலீஸ் அதிகாரி, உளவுத்துறை தலைவர், உள்ளூர் ராணுவத் தளபதி மற்று 2 நேட்டோ ஆலோசகர்களுடன் பேசிக் கொண்டிருந்தார் என்றனர்.

நானும், மற்ற அதிகாரிகளும் பேச்சுவார்த்தை நடத்திய அறையில் இருந்து ஏகே 47 ரக துப்பாக்கியால் தீவிரவாதிகளைத் தாக்கினோம். நானே ஒரு தீவிரவாதியை சுட்டுக் கொன்றேன். என்னைக் கொல்ல நடக்கும் இரண்டாவது முயற்சி இது. என்னிடம் ஏகே 47 ரக துப்பாக்கி இருந்தது. அதை வைத்து நான் ஜன்னல் வழியாக தீவிரவாதிகளை சுட்டேன் என்றார்.

இந்த துப்பாக்கிச் சூடு சுமார் 1 மணி நேரம் நீடித்தது என்று அதில் கலந்து கொண்ட மாகாண போலீஸ் அதிகாரி ஷெர் அகமது மாலதானி தெரிவித்தார்.

English summary

6 suicide bombers attacked the Afghanistan's Parwan province governor's house in which atleast 22 people got killed. Governor Abul Basir Salangi was there in there in a meeting at the time of attack. This is the second attempt on his life in the past month.