அன்னா ஹஸாரேவின் போராட்டத்துக்கு காங்கிரஸ் எம்.பிக்கள் திடீர் ஆதரவு

டெல்லி: அன்னா ஹஸாரேவின் போராட்டத்துக்கு காங்கிரஸ் எம்.பிக்கள் பிரியா தத் மற்றும் சஞ்சய் நிருபம் ஆகிய இருவர் ஆதரவு தெரிவித்துள்ளனர். இருவரும் மகாராஷ்டிராவைச் சேர்ந்தவர்கள் என்பது குறிப்பிடத்தக்கது.

இவர்களில் பிரியா தத், அன்னா ஹஸாரேவின் கோரிக்கைகளை தானும் ஏற்பதாக தெரிவித்ததால் காங்கிரஸ் கட்சியினரிடையே சலசலப்பு ஏற்பட்டுள்ளது.

எம்.பிக்கள், அமைச்சர்கள் வீடுகளை முற்றுகையிட்டுப் போராட்டம் நடத்துமாறு அன்னா ஹஸாரே அழைப்பு விடுத்திருந்தார். அதை ஏற்று நேற்று எம்.பிக்கள், அமைச்சர்கள் வீடுகளை பல இடங்களில் அன்னா ஆதரவாளர்கள் முற்றுகையிட்டு அமைதி வழியில் போராட்டம் நடத்தினர்.

மும்பை பந்த்ராவில் உள்ள பிரியா தத்தின் வீட்டுக்கும் 50க்கும் மேற்பட்டோர் சென்றனர். அவர்களிடையே பிரியா தத் பேசினார். அப்போது அவர் கூறுகையில் எல்லோரையும் போலவே நானும் வலுவான லோக்பால் மசோதாவை விரும்புகிறேன். நீதித்துறையும் அதில் சேர்க்கப்பட வேண்டும். பிரதமர் பதவியும் சேர்க்கப்பட வேண்டும். பிரதமருக்கே இதில் ஆட்சேபனை இல்லை என்று நான் கருதுகிறேன் என்றார். இதைக் கேட்டதும் கூடியிருந்தவர்களுக்கு வியப்பாகி விட்டது. பிரியாவின் பேச்சை கை தட்டி வரவேற்றனர்.

தொடர்ந்து பேசிய பிரியா தத், இருப்பினும் அரசு கொடுத்த வரைவு மசோதாவும் சரி, அன்னா ஹஸாரே குழுவினர் கொடுத்துள்ள வரைவு மசோதாவும் சரி இரண்டுமே முழுமையானதாக இல்லை. பேச்சுவார்த்தை மூலம் முழுமையான, விசாலமான மசோதாவை இருதரப்பும் உருவாக்க முயல வேண்டும்.

ஊழலற்ற நாடாக இந்தியாவை மாற்ற வேண்டும் என்ற ஊழலுக்கு எதிரான இந்தியா அமைப்பின் கோரிக்கையை நானும் முழுமனதாக ஆதரிக்கிறேன், ஏற்கிறேன் என்றார் பிரியா.

இதேபோல விலே பார்லே பகுதியில் உள்ள சஞ்சய் நிருபம் வீட்டுக்கு அன்னா ஆதரவாளர்கள் சென்றபோது அவர் அன்னா தொப்பி அணிந்தபடி அவர்களைச் சந்தித்தார். அவர்களிடையே நிருபம் பேசுகையில், அன்னா ஹஸாரேவின் போராட்டத்தை நான் ஆதரிக்கிறேன். அவரது போராட்டம் நல்ல நோக்கத்தின் அடிப்படையிலானது. இருப்பினும் நான் ஒருவனால் எதையும் சாதிக்க முடியாது என்றார்.

இதேபோல பல்வேறு எம்.பிக்களும் ஹஸாரேவின் போராட்ட நோக்கத்திற்கு ஆதரவு தெரிவித்துள்ளனர்.

English summary

A call from Ramlila Maidan in Delhi has seen anti-corruption activists knocking at the doors of MPs demanding that Anna Hazare's Jan Lokpal Bill be passed in Parliament. At some doorsteps, the protestors met solid support - very conspicuously from Congress MPs like Priya Dutt and Sanjay Nirupam in an Anna Hazre cap, in Mumbai. Priya Dutt came out of her Bandra home to meet the 50-odd protestors raising pro-Anna slogans and lauded their efforts to fight corruption. She promised them that she was with the people on the demand for a strong Lokpal.