குதிரை மாதிரி சாப்பிட்டாலும் குண்டாக முடியல! இங்கிலாந்து பெண் ஏக்கம்
லண்டன்: இங்கிலாந்தில் இரண்டு பிள்ளைகளின் தாய் குழந்தைகளின் ஆடைகளை அணிகிறார். குதிரை மாதிரி சாப்பிட்டாலும் குண்டாகவே முடியவில்லை என்கிறார் வருத்தமாக.
இங்கிலாந்தில் உள்ள மான்செஸ்டர், ஓல்டாமைச் சேர்ந்தவர் கரோல் பிரென்ச்(50). அவருக்கு 2 குழந்தைகள் உள்ளனர். ஆனால் அவரே குழந்தைகளின் ஆடைகளை அணிகிறார். பார்த்தால் இரண்டு பிள்ளைகளைப் பெற்றெடுத்தவர் என்றே கூற முடியாது அந்த அளவுக்கு ஒல்லிக் குச்சியாய் இருக்கிறார். அதற்கு காரணம் டயட்டோ, உடற்பயிற்சியோ இல்லை. அவருக்கு மஸ்குலார் பைப்ரோசிடிஸ் டிஸ்ப்ரபோர்ஷன் என்னும் ஒரு வகையான தசை சம்பந்தப்பட்ட நோய் உள்ளது.
அந்த நோய் உள்ளவர்கள் என்ன தான் முக்கி, முக்கி சாப்பிட்டாலும் சதையே வைக்காது. பார்ப்பதற்கு எலும்பும், தோளுமாய் தான் இருப்பார்கள்.
இது குறித்து கரோல் கூறியதாக டெய்லி மெயில் வெளியிட்ட செய்தியில் கூறியிருப்பதாவது,
நான் இளம் வயதில் இருக்கையில் எல்லோரும் நான் வேண்டும் என்றே உடம்பை ஒல்லியாக வைத்திருக்கிறேன் என்று நினைத்தனர். நான் குதிரை மாதிரி சாப்பிடுவேன். ஒரு நேர உணவைக் கூட விடமாட்டேன். வாரத்தில் ஒரு தடவை சைனீஸ் உணவு சாப்பிடுவேன். ஆனாலும் குண்டாக முடியவில்லை. நான் என்ன வேண்டும் என்றேவா இப்படி இருக்கிறேன்.
என்னைப் பார்ப்பவர்கள் ஏதோ பார்க்காத ஒன்றைப் பார்த்தது போன்று என்னுடன் புகைப்படம் எடுத்துக் கொள்கிறார்கள். அது எனக்கு வருத்தம் அளிப்பதாக உள்ளது என்று அதில் கூறப்பட்டுள்ளது.
பலர் உடம்பைக் குறைக்க முடியாமல் கஷ்டப்பட்டிருக்க கரோலா குண்டாக மாட்டோமா என்ற ஏக்கத்திலேயே வாழ்கிறார்.
Click it and Unblock the Notifications
Sign in with Google