மருத்துவமனையில் அமர், இன்று ஜாமீன் மனு விசாரணை

டெல்லி: ராஜ்யசபா உறுப்பினர் அமர் சிங் டெல்லியில் உள்ள அனைத்திந்திய மருத்துவ அறிவியல் கழக மருத்துவமனையில் அனுமதிக்கப்பட்டுள்ளார். அவரது ஜாமீன் மனு மீதான விசாரணை இன்று நடக்கவிருக்கிறது.

கடந்த 2008-ம் ஆண்டு நாடாளுமன்றத்தில் நடந்த நம்பிக்கை வாக்கெடுப்பில் வாக்களிக்க எம்.பி.களுக்கு பணம் கொடுத்த வழக்கில் எம்.பி.யும், சமாஜ்வாடி கட்சி முன்னாள் உறுப்பினருமான அமர் சிங் கைது செய்யப்பட்டு திஹார் சிறையில் அடைக்கப்பட்டார். அவர் ஜாமீன் கோரி நீதிமன்றத்தில் மனு தாக்கல் செய்தார்.

இந்த மனு மீதான விசாரணை நேற்று நடந்தது. வழக்கை விசாரித்த நீதிபதி சங்கீதா ஜாமீன் கொடுப்பது பற்றி இன்று(13-ம் தேதி) தீர்ப்பளிக்கப்படும் என்று கூறி வழக்கை ஒத்திவைத்தார்.

இந்நிலையில் அமர் சிங்கிற்கு திடீர் உடல் நலக்குறைவு ஏற்பட்டதால் நேற்றிரவு 8 மணி அளவில் அவரை டெல்லியில் உள்ள அனைத்திந்திய மருத்துவ அறிவியல் கழக மருத்துவமனையில் சேர்த்ததாக திஹார் சிறையின் செய்தித் தொடர்பாளர் சுனில் குப்தா தெரிவித்தார்.

முதலில் சிறையில் உள்ள மருத்துவர்கள் அமர் சிங்கை பரிசோதித்துவிட்டு அவரை உடனடியாக அனைத்திந்திய மருத்துவ அறிவியல் கழக மருத்துவமனையில் சேர்க்குமாறு பரிந்துரைத்தனர். அதன்படி தான் அவர் மருத்துவமனையில் உள்ளார். அங்கு நெப்ராலஜி துறை தலைவர் டாக்டர் குப்தா அமர் சிங்கிற்கு சிகிச்சை அளித்து வருகிறார்.

அமர் சிங்கின் உடல்நலக்குறைவை காரணம் காட்டி தான் அவருக்கு ஜாமீன் கோரப்பட்டுள்ளது. சிறுநீரக மாற்று அறுவை சிகிச்சை செய்யப்பட்ட அவர் திஹார் சிறையில் மற்ற கைதிகள் பயன்படுத்தும் பொதுக் கழிவறையை பயன்படுத்துவதால் அவருக்கு உடல் நலக்குறைவு ஏற்படுகிறது என்று அவரது வழக்கறிஞர் தெரிவித்தார்.

ஆனால் அமர் சிங்கை தனி அறையில் சுகாதாரமான சூழ்நிலையில் தான் வைத்துள்ளதாக திஹார் சிறை அதிகாரிகள் தெரிவித்துள்ளனர்.

அமர் சிங்கிற்கு எடுக்கப்பட்ட மருத்துவப் பரிசோதனை அறிக்கை இன்னும் கிடைக்கவி்ல்லை. முதலில் பரிசோதனைக்கு ரத்தம் கொடுக்க மறுத்த அமர் இன்று காலை தான் ரத்தம் கொடுக்க சம்மதித்தார்.

English summary

Rajya Sabha member Amar Singh is admitted at AIIMS last night after his cretonne level has increased. His bail plea is coming for hearing today. He has asked bail putting forth his health issue.