உள்ளாட்சித் தேர்தலுக்கான காங். வேட்பாளர் பட்டியல் இன்று வெளியீடு

சென்னை: உள்ளாட்சித் தேர்தலில் தனித்துப் போட்டியிடும் நிலைக்குத் தள்ளப்பட்டுள்ள தமிழக காங்கிரஸ் கட்சியின் வேட்பாளர் பட்டியல் இன்று வெளியிடப்படும் என்று காங்கிரஸ் தலைவர் பதவியில் தொடர்ந்து நீடித்து வரும் தங்கபாலு கூறியுள்ளார். இதனால் சத்தியமூர்த்தி பவனில் பல்வேறு போராட்டக் காட்சிகள் அரங்கேறும் சூழல் ஏற்பட்டுள்ளது.

காங்கிரஸ் சார்பில் போட்டியிடும் வேட்பாளர்களைத் தேர்வு செய்ய பல்வேறு கோஷ்டிகளின் தலைவர்கள் அடங்கிய 13 பேர் கொண்ட பட்டியலை காங்கிரஸ் மேலிடம் அமைத்துள்ளது. இந்தக் குழுவுக்கு தங்கபாலு தலைவராக உள்ளார்.

இந்த ஒருங்கிணைப்புக் குழுவின் ஆலோசனைக் கூட்டம் நேற்று மாலை சத்தியமூர்த்தி பவனில் நடந்தது. அதில், குழுவில் இடம் பெற்றுள்ள கோஷ்டித் தலைவர்களான ஜி.கே.வாசன், ஈவிகேஎஸ் இளங்கோவன், பீட்டர் அல்போன்ஸ், ஜெயந்தி நடராஜன், யசோதா உள்ளிட்டோர் பங்கேற்றனர்.

இந்தக் குழுவினர் கூடி வேட்பாளர்கள் குறித்து ஆலோசனை நடத்தினர். ஆலோசனைக்குப் பின்னர் செய்தியாளர்களிடம் பேசிய தங்கபாலு, வேட்பாளர் பட்டியல் திங்கள்கிழமை வெளியிடப்படும் என்று தெரிவித்தார்.

இதையடுத்து சத்தியமூர்த்தி பவனில் பல்வேறு கோஷ்டிகளின் போராட்டக் காட்சிகள் அரங்கேறும் என்று எதிர்பார்க்கப்படுகிறது. இதனால் சத்தியமூர்த்தி பவனில் பரபரப்பு நிலவுகிறது.

English summary

Tamil Nadu Congress will release its candidates list for the local body polls today. Party's 13 member coordination committee was convened yesterday and discussed about the candidates. Congress party is facing the polls alone this time.