2ஜி ஊழல் விவகாரம்: அனில் அம்பானிக்கு நற்சான்றிதழ் அளிக்கவில்லை- சிபிஐ

டெல்லி: 2ஜி ஊழல் விவகாரத்திற்கும் ரிலையன்ஸ் டெலிகாம் அதிபர் அனில் அம்பானிக்கும் எந்தவித தொடர்பும் இல்லை என்று டெல்லி சிறப்பு நீதிமன்றத்தில் சிபிஐ அறிக்கை தாக்கல் செய்துள்ளது. அதேசமயம், அனில் அம்பானி குற்றமற்றவர் என்று தாங்கள் நற்சான்றிதழ் அளிக்கவில்லை. விசாரணை தொடர்கிறது என்று சிபிஐ தெரிவித்துள்ளது.

2ஜி ஊழல் வழக்கில் ரிலையன்ஸ் டெலிகாம் நிறுவன அதிகாரிகள் 3 பேர் கைது செய்யப்பட்டு சிறையில் உள்ளனர். இந்நிலையில் இந்த விவகாரத்தில் ரிலையன்ஸ் டெலிகாம் அதிபர் அனில் அம்பானியின் தொடர்பு குறித்தும் விசாரித்து வருவதாக சிபிஐ கடந்த சில நாட்களுக்கு முன்பு உச்ச நீதிமன்றத்தில் தெரிவித்தது.

டெல்லி சிபிஐ சிறப்பு நீதிமன்றத்தில் ரிலையன்ஸ் சார்பில் ஆஜரான வழக்கறிஞர் வாதாடுகையில், ஸ்வான் டெலிகாம் நிறுவனத்தில் ரிலையன்ஸ்சுக்கு 9.9 சதவீத பங்குகள் இருந்தன. ஆனால், ஸ்பெக்ட்ரம் ஒதுக்கீடு நடந்தபோது அதில் ரிலையன்ஸ் பங்குகள் இல்லை.

மேலும் ஸ்வான் டெலிகாமில் 10 சதவீதத்துக்கும் குறைவாகவே ரிலையன்ஸ் டெலிகாமுக்கு பங்குகள் உள்ளதாக சட்ட அமைச்சக ரிப்போர்ட்டில் கூறப்பட்டுள்ளதால், இந்த விவகாரத்தில் ரிலையன்சுக்கு தொடர்பில்லை என்பது உறுதியாகிறது. இதனால் இந்த வழக்கிலிருந்து ரிலையன்ஸ் டெலிகாம் நிறுவனத்தை விடுவிக்க வேண்டும் என்றார்.

இந்நிலையில் 2ஜி வழக்கில் கடந்த 29-ம் தேதி சிபிஐ அறிக்கை தாக்கல் செய்தது. அதில் 2ஜி ஊழல் விவகாரத்திற்கும் ரிலையன்ஸ் டெலிகாம் அதிபர் அனில் அம்பானிக்கும் எந்தவித தொடர்பும் இல்லை என்று குறிப்பிடப்பட்டுள்ளது.

சிபிஐ தாக்கல் செய்த அறிக்கையில் கூறியிருப்பதாவது,

2ஜி ஸ்பெக்ட்ரம் விவகாரத்தில் பணப் பரிமாற்றம் மற்றும் பல்வேறு நிறுவனங்களில் தொடர்பு என்ற வகையில் அனில் அம்பானிக்கு எதிராக வாய்மொழி ஆதாரமோ அல்லது ஆவணங்களோ விசாரணையில் சிக்கவில்லை. இன்றைய தேதி வரை 2ஜி ஸ்பெக்ட்ரம் ஊழலில் நேரடியாகவோ, மறைமுகமாகவோ அனில் அம்பானிக்கு தொடர்பு இருப்பதாக ஆதாரங்கள் கிடைக்கவில்லை என்று குறிப்பிடப்பட்டுள்ளது.

தற்போது இதுகுறித்து விளக்கம் அளித்துள்ளது சிபிஐ. அதில், அனில் அம்பானிக்கு 2ஜி விவகார்ததில் தொடர்பு இல்லை என்று தெரிவித்த போதிலும் அவர் குற்றமற்றவர் என்று நற்சான்றிதழ் ஒன்றும் வழங்கவில்லை. 2ஜி விவகாரத்தில் அவருக்கு உள்ள தொடர்பு குறி்த்து தொடர்ந்து விசாரணை நடத்தப்படும் என்று சிபிஐ தெரிவித்துள்ளது.

English summary

CBI has sumbitted a report in the Delhi special court saying that Reliance telecom owner Anil Ambani doesn't have any connection with 2G scam case. Earlier, Anil Ambani's lawyer has told that Reliance has just 9.9.% share in Swan telecom and that too Anil's company didn't have any shares there when spectrum was allocated.