ஆர்எஸ்எஸ் ஆதரவு ஹஸாரேவின் பிரச்சாரம் காங்கிரஸை பாதிக்காது! - அரியானா காங்கிரஸ்

அரியானா: ஆர்எஸ்எஸ் பின்னணி கொண்ட அன்னா ஹஸாரேவின் பிரச்சாரம் எந்த வகையிலும் காங்கிரஸ் வெற்றியைப் பாதிக்காது என அரியானா மாநில காங்கிரஸ் கூறியுள்ளது.

அரியானா மாநிலம் ஹிஸ்ஸார் பாராளுமன்ற தொகுதிக்கான இடைத்தேர்தலில் காஹ்கிரஸை தோற்கடிக்கப் பாடுபடுவோம் என அன்னா ஹஸாரேவும் அவரது குழுவில் உள்ள கேஜ்ரிவால் போன்றவர்களும் 'சபதம்' செய்து பிரச்சாரத்தையும் ஆரம்பித்துவிட்டனர்.

அரியானா மாநில காங்கிரஸ் தலைவர் சந்த் முல்லானா இதுகுறித்து பேசுகையில், "அன்னா ஹசாரேயின் பிரசாரம் காங்கிரஸ் கட்சியின் வேட்பாளர்களின் தேர்தல் வெற்றி வாய்ப்புகளை எந்த வகையிலும் பாதிக்காது.

ஹஸாரே யார் என்பதை இப்போது நாட்டு மக்கள் புரிந்து கொண்டிருப்பார்கள். ஆர்எஸ்எஸ் மதவாத சக்திகளின் துணையோடு, மதச்சார்பற்ற காங்கிரஸை வீழ்த்தப் பார்க்கிறார். இதற்கு ஊழல் எதிர்ப்பு என்ற முகமூடியை அவர் பயன்படுத்துகிறார்.

இதனை ஹஸாரே மறுத்தாலும், ஆர்எஸ்எஸ், பாஜக, விஎச்பி போன்ற மதவாத சக்திகள் இன்று ஒப்புக் கொண்டுள்ளன. எனவே மக்கள் புரிந்து கொண்டுள்ளனர். காங்கிரஸ் நிச்சயம் வெற்றி பெறும்," என்றார்.

English summary

Haryana Congress today said it was not perturbed by Anna Hazare's campaign against the party and asserted it would not have any impact on the poll prospects of its candidates here.