அரவிந்த் கேஜரிவால் மீது ஷூ வீச்சு.. தாக்கவும் முயற்சி!

லக்னெள: உத்தரப் பிரதேசத்தில் பொதுக் கூட்டத்தில் பேச வந்த அன்னா ஹசாரே குழுவின் உறுப்பினரான அரவிந்த் கேஜரிவால் மீது ஷூ வீசப்பட்டு அவரைத் தாக்கவும் முயற்சி நடந்தது. இதையடுத்து ஷூ வீசிய நபரை கூட்டத்தில் இருந்தவர்கள் அடித்து உதைத்தனர். இதையடுத்து போலீசார் விரைந்து வந்து அந்த நபரைக் கைது செய்தனர்.

இன்று மாலை இந்த சம்பவம் நடந்தது. கூட்டத்தில் பேசுவதற்காக அமர்ந்திருந்த அரவிந்த் கேஜரிவாலை நோக்கி தனது ஷூவை வீசிய நபர், பின்னர் அவரை தாக்கவும் முயன்றார். இதையடுத்து கூட்டத்தில் இருந்தவர்கள் அவரை புரட்டி எடுத்தனர்.

''நாட்டு மக்களை ஹசாரே குழு ஏமாற்றி வருவதாகவும், இதனால் தான் காலணியை வீசி தாக்குதல் நடத்தியதாகவும்'' அந்த நபர் கூறியுள்ளார். அந்த நபரின் பெயர் ஜிதேந்தர் என்று தெரியவந்துள்ளது.

சில நாட்களுக்கு முன்னர் தான் இந்தக் குழுவைச் சேர்ந்த பிரஷாந்த் பூஷண், காஷ்மீர் குறித்த சர்ச்சையான கருத்துத் தெரிவித்ததைத் தொடர்ந்து தாக்கப்பட்டார். இந் நிலையில் இன்று அரவிந்த் மீது தாக்குதல் நடந்துள்ளது.

'உள் பூசல்'- ஹசாரேவின் குழுவிலிருந்து 2 பிரமுகர்கள் விலகல்:

இந் நிலையில் லோக்பால் விவகாரத்தில் எங்களது அணி மிக ஒற்றுமையாக செயல்படும் என்று அன்னா ஹசாரே கூறியுள்ள நிலையில், அவரது குழுவில் நிலவி வரும் உள் பூசல் வெளியில் வந்துள்ளது.

அந்தக் குழுவைச் சேர்ந்த இரு முக்கிய உறுப்பினர்களான பி.வி.ராஜகோபால், ராஜேந்திர சிங் ஆகியோர் அதிலிருந்து ராஜினாமா செய்துள்ளனர்.

இந்த இருவருக்கும் அரவிந்த் கேஜரிவாலுக்கும் ஒத்துப் போகவில்லை என்று தெரியவந்துள்ளது. கேஜரிவால் மிகவும் அதிகாரத் தோரணையுடன் நடந்து கொள்வதாக இருவரும் குற்றம் சாட்டியுள்ளனர்.

பிரஷாந்த் பூஷண் விவகாரத்திலேயே ஹசாரேவின் குழுவில் பிளவு ஏற்பட்டுள்ள நிலையில், இப்போது தனிப்பட்ட மோதல்களால் இருவர் ராஜினாமா செய்யும் நிலை உருவாகியுள்ளது.

எங்கள் குழு குறித்து தவறான செய்திகள் வெளியாகி வருகின்றன. நாங்கள் மிக ஒற்றுமையாக இருக்கிறோம் என்று நேற்று தான் அன்னா ஹசாரே நிருபர்களிடம் கூறியது குறிப்பிடத்தக்கது. இந் நிலையில் இன்று இருவர் ராஜினாமா செய்துள்ளனர்.

English summary

Team Anna continues to face internal bickering as two members of its core committee resigned on Tuesday over differences with Arvind Kejriwal. The two members -- P.V. Rajagopal and Rajendra Singh -- accused Kejriwal of being autocratic and cited this as the reason for quitting in the their letters to Anna Hazare informing him about their decision.