சன் டைரக்ட் டிடிஎச் சேவைக்கு ஸ்பெக்ட்ரம் ஒதுக்கியதிலும் முறைகேடு?: சிபிஐ விசாரணை ஆரம்பம்

டெல்லி: ஏர்செல் நிறுவனத்தை வலுக்கட்டாயமாக மலேசியாவின் மேக்சிஸ் நிறுவனத்துக்கு விற்க வைத்ததிலும், அந்த நிறுவனத்துக்கு 2ஜி ஸ்பெக்ட்ரம் ஒதுக்கீடு செய்த விவகாரத்திலும் சிக்கலில் மாட்டியுள்ள முன்னாள் தொலைத் தொடர்புத்துறை அமைச்சர் தயாநிதி மாறனுக்கு இன்னொரு பிரச்சனையும் வந்துள்ளது.

தனது சொந்த நிறுவனமான சன் குழுமத்தின் சன் டைரக்ட் டிடிஎச் சேவைக்கு ஸ்பெக்ட்ரம் ஒதுக்கப்பட்டதில் தயாநிதி மாறனின் பங்கு குறித்தும் சிபிஐ தனது விசாரணையை ஆரம்பித்துள்ளது.

டிடிஎச் (direct-to-home) சேவை வழங்கும் நிறுவனங்களுக்கு ஸ்பெக்ட்ரம் ஒதுக்கப்பட்ட முறை குறித்து விசாரணையை ஆரம்பித்துள்ள சிபிஐ, குறிப்பாக சன் டைரக்ட் சேவை மீது கண் வைத்துள்ளது.

இந்த நிறுவனங்களுக்கு எதன் அடிப்படையில் ஸ்பெக்ட்ரம் ஒதுக்கப்பட்டது என்ற விவரத்தை தொலைத் தொடர்புத்துறையிடம் சிபிஐ கோரியது. இந்த ஒதுக்கீடு தொடர்பான அனைத்து பைல்களையும் தன்னிடம் ஒப்படைக்குமாறும் சிபிஐ உத்தரவிட்டது.

இதையடுத்து டிஷ் டிவி, ரிலையன்ஸ் பிக் டிவி, பாரதி-மல்டி மீடியா, பாரதி பிசினஸ் சேனல், தூர்தர்ஷன், சன் டைரக்ட், டாடா ஸ்கை ஆகிய நிறுவனங்களுக்கு டிடிஎச் சேவைக்கு ஸ்பெக்ட்ரம் ஒதுக்கப்பட்டது தொடர்பான ஆவணங்களை சிபிஐயிடம் தொலைத் தொடர்புத்துறை சமர்பித்தது.

இந்த ஆவணங்களை ஆய்வு செய்த சிபிஐ, சன் டைரக்ட் ஆவணங்களை மட்டும் தன் வசம் வைத்துக் கொண்டு மற்ற பைல்களை தொலைத் தொடர்புத்துறையிடம் திரும்பத் தந்துவிட்டது. இதனால், சன் டைரக்ட் விஷயத்தில் மேலும் சிபிஐ குடையப் போவது நிச்சயமாகியுள்ளது.

ஏற்கனவே ஏர்செல் அதிபர் சிவசங்கரனை மிரட்டி அந்த நிறுவனத்தை மலேசிய நிறுவனத்துக்கு வலுக்கட்டாயமாக விற்க வைத்த விவகாரத்தில் தயாநிதி அவரது சகோதரர் கலாநிதி மீது சிபிஐ வழக்குப் பதிவு செய்துள்ளது. ஏர்செல் நிறுவனத்தை வாங்கிய மேக்சிஸ் நிறுவனம் சன் டைரக்ட் சேவையில் முதலீடு செய்த சுமார் ரூ. 400 கோடி பணம் தயாநிதிக்குத் தரப்பட்ட லஞ்சமாகவே சிபிஐயால் கருதப்படுகிறது.

இது தவிர தொலைத் தொடர்புத்துறை அமைச்சராக இருந்தபோது சுமார் 323 அதிக சக்தி வாய்ந்த தொலைபேசி ISDN கேபிள்களை தனது வீட்டில் வைத்திருந்து, அதை அண்டர்கிரவுண்ட் கேபிள் மூலம் சன் டிவி அலுவலத்துடன் இணைத்து, அந்த இணைப்புகளை சட்ட விரோதமாக சன் டிவிக்காக பயன்படுத்தியதாகவும் இன்னொரு வழக்கும் சிபிஐ பதிவு செய்துள்ளது.

தொலைத் தொடர்புத்துறை ஜெனரல் மேனஜர் பெயரில் ஒதுக்கப்பட்ட இந்த அதிவேக சக்தி கொண்ட தொலைபேசி இணைப்புகள், சன் டிவிக்காக பயன்படுத்தப்பட்டதாக குற்றம் சாட்டப்பட்டுள்ளது.

இந் நிலையில் சன் டைரக்ட் டிடிஎச் சேவைக்கு ஸ்பெக்ட்ரம் ஒதுக்கப்பட்டதிலும் முறைகேடு நடந்துள்ளதாக சிபிஐ கருதுகிறது. இதனால் அதையும் தோண்ட ஆரம்பித்துள்ளது.

English summary

After his alleged involvement in the 2G scam and leasing of telephone lines, former telecom minister Dayanidhi Maran's 'role' in sanctioning of spectrum to Sun Direct is now being looked into by the CBI. The agency had sought the files from Department of Telecommunications related to spectrum allocation made to direct-to-home (DTH) broadcasters by seeking details of sanction of bandwidth.