மதுரை விமான நிலையத்தில் மீனாட்சி அம்மன் சிலையை நிறுவ அழகிரி கோரிக்கை

By Chakra

Published: Thursday, November 17, 2011, 15:03 [IST]

Subscribe to Oneindia Tamil

மதுரை: மதுரை விமான நிலையத்தில் மீனாட்சி அம்மனின் சிலையை நிறுவ வேண்டும் என்று விமானப் போக்குவரத்துத் துறை அமைச்சர் வயலார் ரவியிடம் மத்திய உரத்துறை அமைச்சர் மு.க.அழகிரி கோரிக்கை விடுத்துள்ளார்.

இதை அழகிரியே நிருபர்களிடம் தெரிவித்தார். அவர் கூறுகையில், மக்கள் நலப்பணியாளர்கள் நீக்கத்தைக் கண்டித்து திமுக நடத்திய போராட்டத்தில் ஏராளமானோர் கலந்து கொண்டனர். திமுகவினர் எழுச்சியுடன் தான் உள்ளனர்.

சமீபத்தில் மத்திய விமானப் போக்குவரத்துறை அமைச்சர் வயலார் ரவியை நான் சந்தித்து, மதுரை விமான நிலையத்தை சர்வதேச விமான நிலையமாக மாற்ற நடவடிக்கை எடுக்க வேண்டும் என்று கோரிக்கை வைத்தேன்.

மேலும் மதுரையில் இருந்து சேலம், அந்தமான் உள்ளிட்ட இடங்களுக்கு விமானங்களை இயக்க நடவடிக்கை எடுக்க வேண்டும் என்றும் கோரினேன். பரிசீலிப்பதாக அவரும் உறுதி அளித்துள்ளார்.

அதிமுக ஆட்சிக்கு வந்த பின் அண்ணா பல்கலைக்கழகத்தின் மதுரைப் பிரிவை மூட நடவடிக்கை எடுக்கப்பட்டுள்ளது. இந்த ஆட்சியில் தொடர்ந்து மக்கள் நலத்திட்டங்களுக்கு மூடுவிழா நடத்தப்பட்டு வருகிறது என்றார்.

Published On November 17, 2011