சபாநாயகர் மீரா குமார் குடும்ப வாடகை பாக்கி ரூ. 1.98 கோடி- 'பில்' அனுப்பிய நகர்ப்புற அமைச்சகம்!

Published: Tuesday, November 22, 2011, 9:32 [IST]

Subscribe to Oneindia Tamil

டெல்லி: லோக்சபா சபாநாயகர் மீரா குமார் குடும்பத்தினர் கடந்த 1986ம் ஆண்டு முதல் வசித்து வரும் பங்களாவுக்கான வாடகை பாக்கியாக 1 கோடியே 98 லட்சத்து 22 ஆயிரத்து 723 ரூபாய் தர வேண்டும் என்று மத்திய நகர்ப்புற அமைச்சகத்தின், எஸ்டேட்ஸ் பிரிவு தெரிவித்துள்ளது. இதுதொடர்பாக அவருக்கு பில் அனுப்பப்பட்டுள்ளதாகவும் அது கூறியுள்ளது.

சுபாஷ் சந்திர அகர்வால் என்ற ஆர்டிஐ சேவகர் கோரிய கேள்விக்கு இந்தப் பதிலை அனுப்பியுள்ளது எஸ்டேட்ஸ் பிரிவு.

இதுதொடர்பாக அந்த பதிலில் தெரிவிக்கப்பட்டுள்ளதாவது:

பாபு ஜெகஜீவன் ராம் மறைவுக்குப் பின்னர் அவரது மகளான மீரா குமார் மற்றும் ஜெகஜீவன் ராமின் குடும்பத்தினர், கடந்த 1986ம் ஆண்டு கிருஷ்ண மேனன் மார்க்கில் உள்ள 6ம் எண் பங்களாவில் தொடர்ந்து வசித்து வந்தனர். அன்று முதல் அவர்கள் இதுவரை வாடகை பாக்கியாக ரூ. 1,98,22,723 வைத்துள்ளனர். இதுதொடர்பாக பில் தயாரிக்கப்பட்டு மீரா குமாருக்கு அனுப்பி வைக்கப்பட்டுள்ளது என்று தெரிவிக்கப்பட்டுள்ளது.

இதேபோல காங்கிரஸ் மூத்த தலைவர் பூட்டாசிங், டிராய் தலைவர் ஜே.எஸ்.வர்மா ஆகியோர் தொடர்பான கேள்விகளும் கேட்கப்பட்டிருந்தன. அதற்கு, அவர்கள் வாடகை பாக்கி எதையும் வைத்திருக்கவில்லை என்று பதில் தெரிவிக்கப்பட்டுள்ளது.

இந்த ஆர்டிஐ பதில் குறித்து மீரா குமார் அலுவலகத்தில் விளக்கம் கேட்டபோது, மறைந்த ஜெகஜீவன் ராம் குடும்பத்தினர் யாரும் அந்த பங்களாவில் தற்போது வசிக்கவில்லை. 2002ம் ஆண்டு நவம்பர் 30ம் தேதியே அங்கிருந்து அனைவரும் காலி செய்து விட்டனர். இதுகுறித்து மத்திய பொதுப்பணித்துறை, எஸ்டேட்ஸ் பிரிவு இயக்குநர் உள்ளிட்ட சம்பந்தப்பட்ட அனைவருக்கும் முறைப்படி தெரிவிக்கப்பட்டுள்ளது.

மேலும், பங்களாவை காலி செய்தவுடனேயே அங்கு குடிநீர், மின்சார இணைப்பு உடனடியாக துண்டிக்கப்பட்டு விட்டது என்று தெரிவிக்கப்பட்டது.

Published On November 22, 2011